Vawiin khan Health Minister Pu Lal Thanzara chuan Mizoram Institute of Medical Education and Research (MIMER) dinna tur Falkawna State Referral Hospital a tlawh.
Pu Lal Thanzara chuan Medical College dinna tura inbuatsaihna chak taka kalpui a ni chu lawmawm a ti a. Mizoram tana rotling, mipuiin nasa taka an chhawr tangkai tur a nih hrerengin Falkawn leh a chhehvela khawtlang hruaitute leh mipui mimir te pawh he hmun enkawlpui tur hian a sawm a. Health department-a thawktute nen thawhhona tha tak neiin MIMER dinna tur hmalakna tluang takin a kal mek a, in refer tak takna tlak hospital thaa siam turin thawktu doctor, nurse leh staff dangte bakah hmanrua leh mamawh hrang hrangin thuam mek a ni, Minister chuan a ti.
Falkawna State Referral Hospital-ah hian tun dinhmunah Department hrang hrang - Surgery, Gynaecology, Medicine, Paedeatrics, ENT, Eye, Ortho, Skin, Dental, Ayush, Chest/Respiratory, Radiology, Anaesthesia leh a dangte a awm a. Specialist sawmhnih chuangin thutchilhin Super specialist, naupang lama thiamna bik nei Paedeatric Surgeon pakhat in a thutchilh bawk. State Transport bus pahnih service in nitin zing dar 8, dar 9, dar 11 leh chawhnu dar 3:30 ah te Aizawl atangin Falkawn Hospital panin a service a, Falkawn atanga Aizawl panin nitin zing dar 9:30, chawhnu dar 1, dar 2 leh dar 4:30 a chhuak a awm reng bawk a ni.
Medical College dinna tur dilna hi kumin July ni 5 khan sawrkar laipui Ministry of Health & Family Welfare-ah thehluh a ni a. Dilna hi an pawm a nih chuan Ministry hian Medical Council of India (MCI) ah thawn phei ve lehin Inspection team-te enfiah turin an lokal dawn a ni. MCI in a phut angin Medical College dinna tur atan Referral Hospital-ah hian October thla chhungin khum 250 neih hman an in beisei a. Damlo in admit zat pawh an pung chak hle a. Kum 2014 ah damlo 645 an admit laiin kum 2015 ah za zela sawmsariha pungin damlo 1092 an admit a. Kumin August thla thleng khan damlo 1247 zet an admit hman tawh a ni. He hospital a Deputy Medical Superintendent leh MIMER dinna tura Nodal Officer ni bawk Dr. Jane Ralte tarlan danin kumin December ni 15 hma hian MCI atangin Inspection Team an lo kal hman ngei beisei a ni.
Health Minister hian Referral Hospital building chipchiar taka a fan bakah TB Hospital a tlawh nghal a. Damlo leh damlo awmpuitu, a mamawh apiang thlen theihna tur Dharamshala sak tumna hmun pawh a tlawh nghal a ni.
Pu Lal Thanzara hi Health Secretary Pu Lalrinliana Fanai, Health Principal Director Dr.K.Ropari, Director Health Services Dr Rohmingthanga Ralte, Director Health & Medical Education Dr. K.Lalbiakzuala, State Referral Hospital Medical Superintendent Dr. Lalhmuchhuaka leh official dang engemawzatin an tawiawm a ni.
