2446/2024-2025

Aizawl 10th October, 2024 : Vawiin chawhma dar 10 khan National Tobacco Control Programme, National Health Mission, Mizoram buatsaih Tobacco Free Youth Campaign 2.0 chu Pi Lalrinpuii, Health Minister-in a Office Chamber-ah  khuhhawnna neiin a tlangzarh.

Health Minister chuan kan rama zuk leh hmuam hluar lutuk avanga cancer natna vei kan tam phah chu pawi a tih thu sawiin naupang thangthar zawkte chuan he natna tihbaiawm tak thlentu pakhat Vaihlo chu hnar ngam a, an fihlim theihna tur chu kan zavaia mawhphurna a ni tih hre thar leh turin Zoram mipuite a ngen a. Sawrkar chuan zuk leh hmuam kaihhnawiha kan fihlim theih nan sum tam tak a sen thin thu sawiin ram hmasawnna thlen tur chuan a ram mipui vantlangte an hrisel a pawimawh a, chuvang chuan Vaihlo ching dawklak te chuan sim a, a la tichhin lo naupangte tihchhinna chuan ngawlveina a thlen thin a nih tih hria-a tichhin loh hram turin tleirawl leh rawltharte chu a chah a ni.

Minister chuan mahni theuha bultan a pawimawh thu sawiin zirtirtute chu an thawhna school theuhah an zirlaite vaihlo laka an fihlim theih nan tan la thar lehzual turin a chah a. "Tobacco free" Zirna In (institution) a nih theih ngei nan hmala theuh tura a sawm bakah Department hotute chuan an enkawl department chu Vaihlo awm lohna hmun a nih theih nan khawng taka dan kengkawh turin a chah bawk a ni.

Dr. H. Lianthangpuia, State Nodal Officer, NTCP & Addl. Director (D) DHME chuan Tobacco Free Youth Campaign 2.0 chungchangah kalkhawmte zirtirna a pe a ni. 

Mizote zingah Vaihlo, zuk leh hmuam hmang kan la tam hle a. Global Adult Tobacco Survey 2016 - 17 a neihin a tarlan danin 58.7% -in Vaihlo, zuk leh hmuam kan hmang mek a ni. Mithiamte chuan vaihlo, zuk leh hmuam hi "Ruihhlo tihna kailawn" (Gateway substance) an lo ti hial a ni. He Campaign-in tihtur a ruahman chu - 

1. Mipui hnena a tam thei ang ber awareness campaign (IEC te hmanga) neih

2. Tobacco Free Educational Institution a tam thei ang neih belh

3. Tobacco Free Village a tam thei ang neih

4. Cigarette & Other Tobacco Product Act leh Prohibition of Electronic Cigarette Act hmanga a tam thei ang activity neih

5. Kuminah hian nikum lama tel lo target an rawn dah thar chu social media hmanga vaihlo, zuk leh hmuam that lohna zirtirna a tam thei ang ber puanchhuah hi a ni. 

He hunah hian COTPA (Cigarette & Others Tobacco products Act) 2003 dan hnuaiah vantlang puipunna hmunah meizuk phal a nih loh mai bakah naupang (minor) hnenah hralh khap a nih thu te, zirna in atanga Yard 100 (91.44 metre) huamchhungah Vaihlo zawrh khap a ni tih leh khapna dan dangte chu uluk zawk leh khawng zawka kenkawh a nih tur thu sawi lan a ni a. Tunlaia lar E-cigarette (Vaping) khapna dan Prohibition of Electronic Cigarettes Act (PECA) 2019 pawh sawi lan niin he dan hian E-cigarette siamchhuah,  khawlkhawm, phurhchhuah, sawimawi, ram dang atanga lakluh leh zawrhte chu a khap tlat a nih tih mipuite'n kan hriat a pawimawh thu tarlan a ni a. Heng E-cigarette (Vaping) kaihhnawih PECA 2019 dan hnuaiah hian a offence a zirin cheng 50,000 atanga nuai 5 thleng pawisa chawitir theih a nih bakah kum 5 thleng lung in tan theihna a nih avangin he E-CIGARETTE (Vaping) vaihlo thlak theitu anga lar hi  Zoram mipuite hian kan hnar a ngaih takzet thu leh kan rama siamchhuah Tuibur-ah te pawh hian a that lohna thuziak (warning sign) tarlan vek ni se tih a ni bawk a ni. 

Pu Sangchhin Chinzah, Secretary, H&FW chuan kalkhawmte lawmna thu sawiin Dr. Eric Zomawia, Mission Director, NHM, Mizoram chuan lawmthu sawina a nei a ni.

Programme-ah hian School Education Director, Health Officials te bakah sawmbikte an tel a ni.