Health & Family Welfare Minister Pu Lal Thanzara chuan vawiin chawhnu khan Lunglei District Hospital-ah National Health Mission hnuaia ruahman Geriatric (Elderly) Ward leh Audiometry Unit te chu a hawng. 

He hawnna inkhawma Khuallian Pu Lal Thanzara chuan Mizorama Elderly Ward hmasa ber Lunglei District Hospital-a hawn a ni chu lawmawm a tih thu a sawi a. Ram changkang apiangin hriselna an ngaipawimawh thin tiin, thil dang dangah hma sawn mah ila ram mipuite kan hrisel si loh chuan awmzia thui tak a nei dawn a ni, a ti. Health department hnuaia doctor indaih lohna sawiin, Minister chuan doctor nei reng a pe duhlo kan nilo a ti a. Doctor indaih lohna a nasat em avangin kan mamawhna hre reng chungin kan indahsak zung zung theilo a, hei hi mipui leh pawl ang pawhin kan harsatna te min hriatpui se ka duh a ni, a ti. Lunglei hospital chu mamawhtute tana tih changtlung tum mek zel a ni tiin, hospital-a hman tur khawl chi hrang hrang 13 NEDP hnuaiah ruahman a nih thu a tarlang a. CT Scan (16 slice) lei turin  NEC atanga sum sanction a nih tawh thu leh Housing Complex sa tura cheng vbch 17.31 DoNER-in a retain thu a tarlang a ni. Cancer natna chungchang sawiin Minister chuan department angin theihtawp chhuah thin mah ila, zuk leh hmuamah mipuite kan thanharha hma kan lak loh chuan beisei leh duh angin hma kan sawn thei lo a ni, a ti bawk. 

Lunglei HPC Vice Chairman Pu S. Laldingliana pawhin mipuite hman tangkai tura Lunglei District Hospital-a Geriatric Ward leh Audiometry Unit hawn a ni chu lawmawm a tih thu sawiin, Lunglei tana Ni chhinchiah tlak tak a ni, a ti a. Health Minister leh department hmalakna te chu fakin, Lunglei tan thil tam tak min tihsak a, chuvang chuan Lunglei vui turah ka indah lo a, lawmthu sawi a lawm nachang kan hriat a ngai a ni, a ti. 

Khualzahawm Principal Director Dr. K. Ropari chuan khawvel thang chho zelah mihring dam hun chhung pawh a rei chho zel a, khawvela kan inelna pawh life expectancy a ni, a ti a. Sawrkarin natna inkaichhawn theihloh (non-communicable disease) a ngai pawimawhin, Mizoramah pawh natna inkaichhawn theihloh enkawl turin, NCD programme - kan invenna tur leh hmuhchhuah zung zungna turin mipui tan a rawn chhawp a ni, a ti. He programme hi hmang tangkai turin a chah a. Lunglei District chhunga Hospital hrang hrang te faina lama tang lehzual turin a chah bawk a ni. 

He hawnna inkhawm hi Lunglei CMO Dr. VLMS Dawngliana chuan a kaihruai a. State Nodal Officer (NCD) Dr Eric Zomawia’n Mizoram leh Lunglei District tana NCD hnuaia hmalakna te a tarlang a ni. Dr.SR Ngurchamliana, District Nodal Officer, NCD chuan Lunglei District Hospitalatana National Programme for Health Care of the Elderly (NPHCE) ruahmanna, technical report a pe bawk a ni.