1224/2024-2025
Aizawl dated 19th July 2024: Vawiin khan Golden Hall, Govt. Hrangbana College-ah zirlai lut tharte lawm luhna hun, ‘Freshers’ Social & Felicitation Program’ chu Pi Lalrinpuii, Minister, Health & Family Welfare Department chuan khuallian niin a hman pui.
Health Minister Pi Lalrinpuii chuan zirlaite fuihna thu sawiin zirlai nih chhung chuan hun leh ngaihtuahna la peng thei, pawl hrang hrang a inhman tam loh a tul thu leh Social media leh internet hman kawngah rilru hruai sual thei thil khawih lo turin a chah a. College zirlaite chu kum leh pumruaah pawh puitling anga ngaih an nih tawh angin hlawhtlinna chang tur chuan mahni inthunun theihna an neih a pawimawh thu a sawi. Health Minister chuan kan ram leh hnam hmakhaw thui tak chu zirlaite kuta innghat a nih thu sawiin College zirlaite chu thiamna rintlak leh tangkai, khawtlang leh ram tana chhawr tlak zir chhuah tum theuh turin a chah a. Hlawhtlinna tluan tling chang tur chuan teirei peihna, tumruhna leh taimakna neih a tul thu a sawi bawk a ni.
Khuallian Pi Lalrinpuii chuan mizo mipate chu ruihhlo lak a fihlim turin leh chhungkaw pa ber mawhphurhna la tlak nih tum tlat turin a fuih a, ruihhlo hman sualna chu hnam hmelma lian ber, hmasawnna tithuanawp thintu, chhungkaw tichhe theitu leh mihring beidawng a siam theitu a nih angin ruihhlo bawiha tang mekte chhanchhuah leh la ti ve lote venhim chu sawrkarin a ngaih pawimawh thu a sawi bawk a ni.
Pu Lalthlengliana Hrahsel, Principal, Govt. Hrangbana College chuan zirlai lut tharte lawmna thu sawiin College chu an tuina hrang hrang haichhuahna hmun atan te, an thiamna tih pun nan leh tih hriamna hmun atan a hmang turin a chah.
Govt. Hrangbana College ‘Freshers’ Social & Felicitation Program’ ah hian College Magazine ‘Herhse’ tlangzarh a ni a, Student Union atangin report ngaihthlak niin Hrangbana Awards, R.Zatlaia Award, Dr. Suprakash Maiti Award leh Department Awards-te sem a ni. 
Govt. Hrangbana College-ah hian Department 10 awmin zirlai hi 1683 an awm mek a. Teaching staff 59 leh non-teaching staff 18 an awm a ni. Kum 2024 University Exam-ah khan heng department hrang hrang atang hian zirlai 25-te chu top 10 ah an lang a, M.Com ah mi panga top 10 ah an lang bawk a ni.

Attachment

  • Loading attachment...