Vawiin khan Health Minister Pu Lal Thanzara chuan Health Workers’ Training Institute, Kulikawn-a Health Worker Batch 30-na te tana thutiam an lak hun ‘Capping & Lamp Lighting Ceremony’ chu a hmanpui. He hun hi Parliamentary Secretary Lt. Col. (Rtd.) Z.S. Zuala, Health Department-a Principal Director leh Director te bakah an thawhpui engemaw zat in an hmanpui bawk a ni.

Health Minister Pu Lal Thanzara chuan Health Worker hna chu Pathian in Missionary ni tura a kohna nia ngaiin leh hrereng chungin chutiang rilru pua khawi hmunah pawh hna thawk turin a ngen a. An thutiam, hriselna kawnga mite tana rawngbawltu leh tanpuitu nih chu engtik lai pawhin hre renga, hlamchhiah loh turin a fuih a. Health Worker te chu thingtlang pilril, doctor leh nurse te thlen phak lohna hmunah te hriselna thu hla auchhuahpuia a taka thawktu an nih dawn avangin an mawhphurhna a sangin an hna chu hna zahawm mite tan malsawmna thlentu nia a ngaih thu a sawi.

Pu Lal Thanzara chuan Sawrkarin Health Worker zirchhuak te hna a pe zung zung thei loa, mahse Sawrkarin a phak tawk angin, a theih ang angin hma a la zel a ni, a ti a. Tih dam leh tanpui ngaite tanpui theih thiamna nei mi thenkhat ten thingtlanga anmahni mamawh ngawih ngawihna hmuna an kal hreh thin hi a vanduaithlak a, hetianga mamawhtu mamawhna hlamchhiah hi a Kristian lovin Ringtute thinlung put dan tur a nilo nia a ngaih thu a sawi a. Sawrkarin min dahna hmuna thuawih taka kan awm leh kan thawh hian mite tan malsawmna kan ni thei a, chu chuan mimal nunah nasa takin hlimna a thlen thei a ni, a ti. Health Worker-te chu nakina Sawrkar hnaa an luh hunah khawi hmunah pawh awm hreh lova mite tan malsawnna ni zel turin a fuih bawk a ni.

He programme ah hian Dr. V. Lalhmingliani, Principal Medical Officer chuan inlawmna thusawiin Pi Zothankhumi, Principal Nursing Officer chuan Health Workers’ Training Institute chanchin leh tobul te tarlangin an mamawh te a sawi.

He hunah hian Health Minister Pu Lal Thanzara’n nikuma India rama nurse te chawimawina sangber Florence Nightingale National Award dawngtu Pi C. Chawngkimi, Principal Nursing Officer (Retd.) hnenah lawmpuina a hlan a. Pi C. Chawngkimi chuan Batch 30-na a Health Worker train chhuak hmeichhe 25 te hi lukhum khum tirin mipa 25 te chu bati a hlan a ni.