2068/2023-2024

Hnahthial the 29th September 2023 : World Bank sum cheng nuai 397 seng a sak Hnahthial Chief Medical Officer’s office building chu vawiin khan Health & Family Welfare Minister Dr R Lalthangliana chuan Khuallian niin a hawng a, Director of Health Services Dr Lalremmawii chuan he hun hi a kaihruai a ni.

Khuallian chuan he hunah hian thu sawiin District tihpuitlinna kal zelah Hnahthial District in Chief Medical Officer’s office building a nei ta chu lawmawm a tih thu a sawi a. District tan thil chhinchhiahtlak tak a ni tiin District CMO leh a thawhpuite bakah Hnahthial mipuite a lawmpui thu a sawi bawk a ni. Minister chuan Covid hrileng leh harsatna tam tak karah Mizoram chuan hmasawnna hrang hrang a hmu a ti a, India ramah nau piang 1000 zela nau boral (Infant Mortality Rate) ah Mizoram chu Pakhatna a nih thu te, Niti Aayog Health Index-ah pakhatna a la nih reng thu leh NAAC assessment-ah Mizoram chu titha ber a nih thu te tarlangin a lawmawm hle a ti.

Khuallian chuan CMO office hawn a nih rual chuan midangte tan inpekna thinlung tak tak nei turin a chah a, tawngkam khat lek pawhin damna a thlen thei a ni tih hre reng tura chahin Hnahthial District leh a chhehvel mipuite tan damna thlentu an nih theih nan duhsakna a hlan a ni. Minister Dr R Lalthangliana chuan Health Department hmachhawp hrang hrang a tarlang a, District thar 3 te tan District Hospital sakna tur cheng nuai 1700 theuh ruahman a nih thu te, Champhai leh ZMC ah Critical Care Block bun a nih dawn thu te leh JICA sum a sak tur Mizoram State Cancer Super Specialty Hospital-te pawh a lawmawm hle rualin thawktu turah indaihlohna a nasa hle a, Mizo thalai rualte chu nasa leh zuala tang turin a fuih a, Ram leh Hnam tan theihtawp chhuah tlang turin kalkhawmte leh thalai rualte a sawm a ni.

CMO office building hawnna inkhawmah hian Rev TC Vanlalmalsawma, BCM Hnahthial South Bialtu Pastor chuan hunserh a hmang a, Pu Lalremsanga, Sr Civil Engineer, MHSSP chuan report tawi pein Lunglei CMO Dr LC Liana chuan lawmthu sawiin hun a khar a ni.

Chief Medical Officers Office Building, vawiin a hawn tak hi World Bank sum cheng nuai 397 senga sak a ni a, Lushai Engineers te thawh niin December ni 17, 2021 khan sak tan a ni. Mizopa chhiara chhawng li a sang niin, square meter 1224 a zau a ni a.

Hnahthial District Hospital hi tunhnaiah thuam that niin heng;
1) New Born Stabilisation Unit (NBSU) - NBSU hi nausen pianghlim atanga thlakhat la tlinglo te enkawlna bik a ni a. Naute thla kimloa piangte, eng nasa Iutuk leh a dangte refer ngailo in a enkawl theih dawn a. Hei hian Hnahthial District leh a chhehvela nau boral (Infant Mortality Rate) a tlak hniam tir ngei beisei a ni.
2) Ultrasound
3) Blood storage centre — Bloodgroup hrang hrang te tul thut (emergency) atan dah thatna a ni.
4) Laboratory-ah Thyroid function test, Truenat, CB NAAT leh thisen test hrang hrang te hi a tih theih a ni.