Pu Lalrinliana, Sailo, Minister, Health & Family Welfare, Department etc chuan Dt 4th December 2012 hian Kawrthah khua-a Community Health Centre (CHC) bulding thar a hawng.
Hawnna inkhawm, Pu H. Lalremthanga SDO(Civil) kaihhruaiah khuallian chuan thusawiin Kawrthah khua a CHC building tha tak leh changtlung tak hawn a lo ni ta chu thil chhinchhiah tlak tak a ni a ti a, Sawrkar in mipuite hriselna a ngaih pawimawh thu sawiin theihtawp a chhuah mek a, hemi a zarah hian kum 2010-2012 chhung hian Award pali (4) Mizoram in kan dawn thusawiin he Award hian Rs nuaih 15 lai a keng tel a ni a ti bawk.
Minister chuan Nu nauchunga thihna leh nausen thihna hi khawvel changkan leh changkan loh tehna pawimawh tak a ni tiin hemi kawngah hian thawktute pawhin theihtawp an chhuah a ngai tak zet a ni a ti .
Khuallian chuan mitinte hian hriselna kan ngaihpawimawh a tul thu sawiin zuk leh hmuamah kan insum a ngai a, ni tiin zuk leh hmuam a vangin natna hlauhawm Cancer vei kan tam hle a, Zemabawk a Cancer veite enkawlna pawh changtlung zawka thuam mek a ni a ti bawk.
Khuallian chuan Mizoram ah Nursing College pali, Saiha, Kolasib, Champhai leh Serchhip ah te Rs VBC 10 theuh senga sak tura ruahman fel a nih thu te, Aizawl leh Mamit ah pawh sa tura hmalak mek a ni a ti bawk.
Minister hian Kawrthah CHC tan hian Ambulace leh X-Ray khawl pek an nih tur thu a sawi bawk.
Pu Lalrinmawia Ralte, Parliamentary Secretary, Home etc Bialtu MLA ni bawk pawhin thusawiin Kawrthah khua-a Damdawiin phuisui leh mawihnai tak hawn a ni ta chu thil lawmawm a ni tiin hei hi Kawrthah khaw mipui bakah a chhehvel a chengte tan pawh tangkai taka hman a nih a beisei thu a sawi bawk.
Kawrthah CHC hi NRHM sum hmanga Rs 123.1lakhs senga sak niin. Dt 1.9.2008 ah sak tan hna thawh niin Dt 10.5.2011 khan sak zawh a ni. Khum 30 awmin Room 12 a awm bawk a ni.
Khuallian Pu Lalrinliana, Sailo Health Minister hi Pu Lalrinmawia Ralte, Parliamentary Secretary, Home etc, Dr Ramfangzauva, Director Health & Services, Dr Gordon Zohmingthanga, Mission Director, NRHM te bakah Officials engemawzatin an tawiawm a ni.
Pu Lalrinliana Sailo, Health Minister hian Dt 5.12.2012 hian Mamit-a District Hospital tlawhin thawktuten an lo dawngsawng a,District Hospital dinhmun leh harsatna an neih ang ang te Minister hnena an lo thlen te ngaihthlak sakin a theih ang anga hmalak anih tur thu a hrilh bawk.
District Hospital Mamit-ah hian Chief Medical Officer 1. Senior Medical Officer 1, District Medical Superintendent leh Doctors 4 (contract basis) Staff Nurse 13 leh Grade IV 4, awmin khum 30 (30 bedded) a awm a ni.
