No.2048/2020-2020   

Aizawl, 15th June, 2020: Vawiin khan Health Minister, Dr.R.Lalthangliana chuan Aizawl khaw chhunga Kohhran enkawl Quarantine Centre 6 te dinhmun enin a tlawh. 

Heng a tlawhte  zingah hian Sevenday Adventist Fellowship Hall-ah chuan Mumbai leh Pune atanga lo haw mi 6 enkawl mek an ni a, naupang pakhat tih loh chu an negative vek a, naupang pakhat result pawh hi a țhat ngei beisei a ni. He lai hmunah hian Task Force-te kaihhruaina hnuaiah an chhungten chaw an pe a ni. 

Secretariat Complex, BCM  Quarantine Center-ah  Kerela, Gujarat, Bangalore atanga lo haw mi 12-te enkawl mek an ni a. Inrinni kal ta a swab sample test result an nghak mek a. He lai hmuna awmte hi an ei leh in man atan an chhungten ni khatah Rs.100 chawiin a bak sorkarin a tumsak a, tun thla ni 20 hian an quarantine hun chhung a tawp tawh dawn a ni.

Salvation Temple Quarantine Centre a mi 11enkawl mekte chu Goa atanga lo hawte an ni a. Mipa 2 leh hmeichhia 9 an ni. Anni pawh hian an swab sample test result an nghak mek a ni. He lai hmuna awmte ei leh in hi sorkarin a tum sak a ni.

Ramthar Bishop House-ah mi 4 an awm mek a, Saint Lawrence ah mi 25 awmin, an chhungte leh kohhran hian ei leh in an tumsak a ni. Heng hmuna quarantine mekte hi vawiinah an swab sample test a ni ang. Roman catholic kohhran hian ram chhung hmun 17-ah quarantine an nei mek a ni.

Armed Veng Community Centre-ah quarantine mek mi 19 an awm a. Goa, Delhi, Rajasthan leh Madhya Pradesh atanga lo haw-te an ni a, an sample test result a tha hlawm a ni. Hengahte hian Task Force ten ei leh in an tumsak a ni.

Bethlehem UPC (NEI) Kohhran biakin a enkawl mek Assam atanga lo haw mi 6 tlawh leh an ni a, ei leh in hi an chhungten an pe a ni. Damlo an awm lo a, swap sample an la test lo.

Quarantine Centre a tlawhna ah te hian Health Minister chuan thu sawiin, "Tunah hian khawl thar RNA Automatic Extraction hi a install chhung neuh neuh ni hnih thum a ngai a, thawktu țhenkhat training pek leh mek nen, test result muang hret chu lo hrethiam turin a ngen a. Kohhran hrang hrangte Covid19 dona ah tlawmngaia  an pen chhuak thei chu lawmawm a tih thu sawiin tun boruaka kohhran leh Task Force-te inpekna ah sorkar aiawhin lawmthu a sawi a ni.

Health Minister chuan tuna positive enkawl mekte zingah serious tak an awm lo tih sawiin boruak hi a ziaawm chho ve hret hret zel a beisei awm tih a sawi a. Quarantine Centre te chu harsatna eng pawh  inthlahrung lova sawi zel turin a chah a. Lunglei lama khawl thar dah tur chah mek pawh vawiin ah mithiam pathum tirh phei an niin anni hian khawl bunna tur te an enfel dawn tih a sawi a. He khawl hi lo thleng mah se, ICMR-in an endik a ngai a, chumi hnuah Pune lama National Institute of Virology ten an pawmpui a ngai a ni, tiin pawngpaw hmanhmawh ngawt theih a nih loh dan a sawifiah a. Tunah hian Mizoram pumah quarantine lai mi 8884 an awm mek a, quarantine centre a awm, chhuah hun tawh la chhuak thei lote pawh Mizo kristian rilru taka lo hrethiam  turin a ngen a ni.

Inrinni kalta khan Health Minister hian Kohhran enkawl Quarantine Centre 10 a lo tlawh tawh a. Vawiina a tlawh ah te hian Health Minister chuan Task Force-te tanpuina pawisa fai a pe vek a ni.

Health Minister hi Pu Lalengmawia, Director, Tourism, Pi Esther Lalruatkimi, Commissioner, School Education, Pu Laldingliana, Commissioner, AMC, Pi K.Lalrinzuali, Director, Higher & Technical Education ten an tawiawm a ni.