1413/2024-2025

Kolasib Dated the 1st August, 2024: Vawiin khan Health Minister Pi Lalrinpuii chuan District Hospital Kolasib a tlawh a, District hospital-a thawktute leh mi pawimawh te nen inkawmhona hun an hmang.

Minister Pi Lalrinpuii chuan, Kolasib district chu a rang lama tlawh a tumna rei tawh mahse remchan lohna chhan hrang hrang avangin a tum anga a tlawh hma theih lo thu sawiin, vawiinah hriselna lama sawrkar hmunhma te leh thawktute a hmun ngeia a tlawh thei chu a lawmawm hle a ni, a ti a. District official te, doctor leh hriselna lama thawk tuten lawm taka an lo dawnsawn avangin lawmthu a sawi a. Kolasib District hospital dinhmun, building leh a thawktute a tak ngeia a hmu chu a hlawkthlak takzet a ni, a ti. 

Pi Lalrinpuii chuan Kolasib District Hospital chu OPD leh IPD a enkawl an neih atanga chhutin Aizawl leh Lunglei tih lohah Mizoram ah a san ber avanga ngaihtuah ngai bik nia a ngaih thu sawiin, 'Tun aia tam zawk Specialist te kan neih a, Ward pawh mumal zawka kan neih hunah chuan hmun dang pan ngai lovin damlo tam zawk in enkawl thei tawh dawn a ni' a ti a. Kolasib District Hospital a thawktuten mamawh an thlen tam tak chu tih nghal theih a nih laiin a then chu la nghah ngai deuh turte an awm thu a sawi. Minister chuan Doctor te lakah mipuiten beiseina sang tak an neih thu sawiin, an tawngkam chu damlote tan damna leh thlamuanna tling a ni a ti. Chutih laiin doctor thenkhat ruihhlo avanga hna thawk tha theilo an awm thin nia sawi awm leh zeuh thin chu pawi a tih thu sawiin, Doctor te leh nurse te chu taima taka  an hna thawk chhunzawm zel turin a fuih.

Minister chuan, Chief Medical Officer Office leh District Medical Superintendent Office tlawh kualin a hmunhma chungchang te, thawktu indaihloh chungchangte, khawl lama an indaihlohna leh an harsatna hrang hrang te chu a theih ang anga hma laksak a tum thu district hotute hnenah a sawi a. Damdawi In-a ward hrang hrang fang kualin Kolasib District Hospital sak lai mek chu a hmunah a en nghal bawk a ni.

Minister tawiawmtu Pu Lalfamkima, Deputy Speaker leh MLA nibawk chuan, Kolasib District chu ramri depa awm anih avangin, sawrkarin a ngaihsak a pawimawh thu a sawi a. Kolasib District Hospital chu thenawm district te leh Mizoram State luhka motor kawngpuiin a paltlangna hmun a nih avangin damlo leh accident awm thut pawha pantu an awm thin thu a sawi a. Damdawiin sak lai mek a nih a vangin damlo ward enkawl a hautak thu leh thawktuten harsatna an tawh thin thu a sawi bawk.

Health Minister hian Hospital sak mek a tlawh bakah hian Hospital a tana hman lai mekte leh OPD te a tlawh bawk a. Kolasib a panna kawngah Lungdai PHC leh Kawnpui PHC te bakah School of Nursing, Thingdawl a tlawh a. Kolasib Vengthar a Urban PHC dahna turte leh Venglai East a UPHC dahna tur hmun te a tlawh bakah Social Welfare Dept in Vengthar a Integrated Tribal Development Agency (ITDA) an sakna tur hmun te a tlawh bawk.

Minister hi Pu Robert C. Lalhmangaiaha, Deputy Commissioner Kolasib te, Dr. Vanlalsawma, Principal Director, Health & Family Welfare Department te, Dr. Lily Chhakchhuak, Joint Director, Health & Family Welfare Department te,  Pu David H. Lalthangliana, Superintendent of Police Kolasib leh official dang ten an tawiawm a ni.