1160/2024-2025

Dated Lawngtlai, 12th July, 2024 : Tukin zing dar 7 khan Pi Lalrinpuii, Health Minister chuan Lawngtlai khawpui chhunga Damdawiin Pathum - District Hospital, Lairam Christian Medical Centre & Hospital (LCMC&H) leh Christian Hospital Lawngtlai te  a tlawh.

Pi Lalrinpuii chuan District Hospital- a thawktute chibai bukna a nei hmasa a. Damdawiina thawkte chu hna ropui tak thawk, mipuite innghahna lian tak an nihna hre reng tur leh chumi rilru pu a thahnemngai taka thawk turin a chah a. Damlote chu an pawimawh ber a, a enkawltute pawhin khawngaih leh lainatna, zaidamna nen a enkawl a tul hle a ti a. Mizoram Health Care System chu thapui thawha siamthat a ngai tak meuh tiin, sawrkarin theihtawp a chhuah mek zel a ni, a ti.  Pharmacist- te pawimawhna sawiin District Hospital pharmacist la neilote pe vek tura hmalak mek niin District Hospital Lawngtlaiah pawh pek nghal a ni ang, a ti. Tun dinhmunah  Health Department indaihlohna a nasa hle tih sawiin, chak zawka hmalak mek zel a ni a, a tahtawla thil tih a ngaih thin avangin kan nghah thiam ve pawh a tul hle a ti.

Health Minister chuan natna khirh bik enkawlna (Critical Care Unit)  ang chi  pawh nei ve thei ngei tura hmalak a tul hle a ti a. A bik takin lung zai ngai (Heart Surgery) ah sawrkar damdawiinah sum tlem zawk senga zai theih thuai a beiseiawm hle a ti a; 'kidney transplant' pawh tih theih thuai a ni dawn  tiin; rethei zawk phai lama kal thei loten an hlawkpui dawn  hle a ni,  a ti. Pi Lalrinpuii chuan In vitro fertilization (IVF)  ti tura phailam pan reng ngai chu a veiawm hle tih tarlangin, Mizoramah ngei ti ve thei tura hmalak a tul a, reilote ah tih ve theih a beisawm hle a ti. District Hospital zawng zawngte  thuamthat a ngai hle a, chak zawka hmalak mek a ni a, Doctor leh staff lam te pawh semrual tan mek zel a nih thu a sawi. District Hospital Lawngtlai mamawh tam tak zingah 'CT Scan' leh 'Dialysis' khawl chu  dah thuai tura kawng dap a ni ang a ti. Kohhran damdawiin pahnihte nen inhawng taka thawhho a tul hle tiin, thawhhona tha a awm chuan mipuite bawkin a hlawkna an tel dawn a, a tul anga hma lo la zel turin Sr. Chief Medical Officer (Sr. CMO) leh Medical Superintendent - te a chah bawk.

Pi Lalrinpuii chuan National Health Mission (NHM) staff-te an pawimawhin an tangkai hle a ti a. NHM Staff te chu Mizoram Health Care System tha tichaktu an ni tak meuh tih  sawiin, thahnem ngai taka thawk zel turin a sawm a. Administration tha tak awm turin Chief Medical Officer leh Medical  Superintendent an pawimawh hle tiin staff- te tha tak enkawl turin a chah a. District Hospital-in mamawh an neih an thlente chu a theih ang ang tihhlawhtling tura hmalak a nih tur thu sawiin, Doctor, Nurse leh staff zawng zawngte Lairam mipuite tana thahnem ngai tak hna thawk zel turin a sawm nghal a ni.

Pi Lalrinpuii hi Dr. David Zothansanga, (Sr. CMO), Dr. Beiparysa K. (Medical Superintendent) leh staff dangten lo dawngsawngin, Medical Ward hrang hrang an fanpui nghal a. Dr. Beiparysa K. chuan District Hospital Lawngtlai dinhmun tlangpui leh mamawh ang angte Minister hnenah hian a thlen nghal a. Health Minister chuan a tul anga hmalak a tum thu a sawi.

District Hospital Lawngtlaiah hian khum 50 awmin tun dinhmunah Doctor 11 an awm mek a ni.

Health Minister chuan LCMC&H leh CHL- a tlawhnaah thawktute inpekna vanga lawmthu sawina a nei hmasa a. A bik takin Kohhran damdawiin pahnih - Lairam Christian Medical Centre & Hospital (LCMC&H) leh Christian Hospital Lawngtlai (CHL)  te chu mipuiten an ngaihlu hle a, beiseina sang tak neiin an pan thin tih hriaa, mipuite beisei ang ngeia hnathawk turin a chah a. Damlo enkawl kawngah duat tak leh hmagaihna nena enkawl fo a tul a, thawktuten theihtawp chhuah a ngai a ni, a ti. Universal Health Care Scheme kalpui turin sawrkarin hma a la mek zel tiin Pi Lalrinpuii chuan August thla tawp lamah chuan hman theih tura chhawpchhuah tum a ni, a ti a.  Universal Health Care Scheme chu mi zawng zawng huap tura duan niin cheng nuai 5 thleng bill theih ani dawn a, Health Care Society ten an enkawl ang a  ti. Universal Health Care Scheme hlawhtlinna turin Kohhran damdawiin leh  mimal damdawiin te an pawimawh hle tih sawiin, private hospital -te nen indawr mek a ni a, Kohhran damdawiin te chuan tha taka tawiawm turin a ngen  a ni.

Pi Lalrinpuii chuan sawrkarin Kohhran damdawiin a ngaipawimawh takzet tih tarlangin, a theihna apiangah sawrkar chuan a tanpui zel dawn a ni, a ti. Private Hospital- ah damlo inenkawl man a sang hle a, Kohhran damdawiinah erawh man tlawm zawka inenkawl theih a nih avangin sawrkar pawhin a thlamuanpui hle a, thlamuanpui tlak taka hna lo thawh chhunzawm zel turin a sawm nghal bawk.

LCMC&H teh CHL- a tlawhnaah Pi Lalrinpuii hi  Doctor leh thawktuten  lo dawngsawngin Hospital Ward hrang hrangte an  fanpui a. LCMC&H tena  'Dialysis' khawl leh 'Blood Bank Licence' an mamawh leh CHL ten Ultrasound khawl an mamawhna te chu tihlawhtling ngei a tum thu a hrilh a ni.  Lairam Christian Medical Centre & Hospital (LCMC&H) hi kum kum 2001 khan din niin, tun dinhmunah khum 60 awmin, Doctor -7 an awm mek a. Christian Hospital Lawngtlai  hi kum 2007 khan din niin, tunah hian khum 40 leh Doctor- 2 an awm mek a ni.

Pi Lalrinpuii hi Dr. SR Ngurchamliana, Addl. Director, DHME, Dr. David Zothansanga  (Sr. CMO, DHL) leh Pu Samuel Lalmalsawma Sailo (SDC) ten an tawiawm a ni.