967/2022-2023
Lunglei the 20th June, 2022 : H&FW Minister Dr R. Lalthangliana chuan vawiin khan Lungleiah H&FW Department kaihhnawih hmasawnna ruhrel hrang hrang hengte - Chief Medical Officer Office Building, Trauma Care Facilities leh Type III Quarter panga (5 Units) a hawng.

Hawnna inkhawm hi Doctors Seminar Hall, Civil Hospital, Lungleiah neih niin Pu Lawmawma Tochhawng, Lunglei HPC Vice Chairman, Dr K Pachhunga, Bamboo Development Board Vice Chairman, Lunglei DC Pu Kulothungan A leh District official dangte, media mi te, tlawmngai pawl aiawhte leh party hruaitute an tel a ni.

Hawnna inkhawm, Dr. T Lalhmangaihi, Principal Director, H&FW Department kaihhruaiah H&FW Minister Dr R. Lalthangliana chuan H&FW kaihhnawih, Mizoram chhimlam District mipuite mamawh ruhrel hrang hrang hawn a ni chu hmasawnna rahbi pawimawh tak a ni a ti a. Mizoramah Healthcare infrastructure ruahman belh zel a ni dawn a, Lunglei Civil Hospital Complex-a Laboratory Building ruahman mek chu nakumah zawhfel beisei anih bakah doctor quarter tur paruk pawh zawhfel thuai anih tur thu a sawi a. JICA kaltlanga cheng vaibelchhe 660 project, Mizoram State Cancer Superspeciality Hospital tur pawh DoNER, Ministry of External Affairs, NITI Aayog, leh Ministry of H&FW ten phalna pe tawhin bultan thuai a nih tur thu a sawi a. Hemi bakah hian World Bank kaltlangin Strengthening of Health System in Mizoram Project hnuaiah cheng vaibelchhe 280 sengin Mizoram health infrastructure tih changtlun hmalakna nikum atanga bultan niin chak taka kalpui mek anih thu a sawi bawk.

A Department chan dangte hnuaia hmalakna kal mek chungchang pawh sawiin Dr R. Lalthangliana chuan Bangladehs nen insumdawn tawnna ti hlawhtling tura hmalakna kal mekah April ni 23, 2022-a Pu Tipu Munshi, Hon’ble Minister, Ministry of Commerce, Bangladesh leh Bangladesh official ten Mizoram rawn tlawhin Mizorama border hmun pawimawhte an rawn enfiah chuan rah tha tak chhuahin Kawrpuichhuah border trade ti hmasawn turin Land Ports Authority of India (LPAI) te chuan DPR cheng vaibelchhe 200 siam tawhin Ministry of Home Affairs ah thehluh thuai anih tur thu a sawi a ni.

Pu Lawmawma Tochhawng, Lunglei HPC Vice Chairman leh Dr K Pachhunga, Bamboo Development Board Vice Chairman te pawhin thu sawiin Covid-19 hrileng avanga harsatna tam tak tawh karah Mizoram chhimlam District mipuite mamawh tak H&FW hmasawnna ruhrel hrang hrang ruahman thar ani chu lawmawm an tih thu ansawi a ni. Dr C. Lalzepuii, Director Health Services, H&FW Department chuan lawmthu sawina hun a hmang a ni.

Pu Francis Zothanpuia chuan Technical report a pe a. Trauma Care Facilities cheng nuai 381 (State Govt – Rs. 300 lakhs, sawrkar laipui Ministry of H&FW – Rs. 81 lakhs) senga ruahman niin emergecy case te, a bi takin accident avanga hliam tuar te lo enkawl vat theihna tur Centre a ni a. Excell Consultancy Services sak a ni. Ground floor, 1st floor leh 2nd floor awmin total floor area hi 997.92 square metres a ni a. Casualty, ICU with isolated rooms (khum paruk), ortho plaster room, pharmacy, Counseling room, Ultrasound room, Xray Room, UPS Room, male ward, female ward, laboratory etc te a keng tel a ni. Chief Medical Officer Office Building hi Chanmari ah awmin state sawrkar sum cheng nuai 250.8 senga ruahman a ni a. ZAMZO Construction and Consultancy Services chu contractor niin 09/01/2020 ah thawk tanin 07/06/2022 ah zawh fel a ni a. Ground floor, 1st floor leh 2nd floor awmin a zavia Floor area hi 513.4 square metres a ni. Type III Quarter panga (5 Units) te hi state sawrkar sum cheng nuai 178.65 senga Brilliant Consultancy te sak niin a zavaia floor area hi 463.42 square metres a ni.