No.2794/2021-2022
Aizawl, 29th October, 2021 : Vawiin khan Health Minister, Dr. R. Lalthangliana chuan Mizoram COVID-19 dashboard chu virtual in a tlangzarh. He COVID-19 dashboard hi Health & Family Welfare Department, Government of Mizoram leh Jhpiego (Japaigo) te tangkawpin an siam a ni a. He dashboard tlangzarhnaah hian Health Secretary, R. Lalramnghaka, IAS, Mission Director, NHM, Dr. Eric Zomawia leh Dr. Sangita Patel, USAID ten thu sawiin, Jhpiego hotute leh Health Department hotu hrang hrangte bakah District tina CMO te an tel bawk a ni. He hunah hian dashboard en hona (demo) neih a ni bawk.

He Mizoram COVID-19 dashboard-ah hian COVID-19 hri vei zat te, COVID-19 vaccine pek tawh zat te, COVID-19 hri kai inenkawlna hmun hrang hranga damlo awm zatte leh ICU-a khum awm zatte, oxygen mamawh zat leh kan neih zat te, COVID-19 hri kaite enkawl nana damdawiin-a kan hmanraw neih zat te awlsam takin a en theih zung zung tawh dawn a ni. Dr. R. Lalthangliana chuan he dashboard hi Mizoram hmung hrang hranga hri veite enkawlna atana hmalak nan kan hman tangkai hle tur thu a sawi a, mipuite tan pawh awlsam taka en theiha a awm hi thil tha tak a ni, a ti.

He COVID dashboard - covid19mizoram.in tih hi a duh apiang te tan en theih a ni.