Mizoram Government Pharmacist’ Association General Conference vawi 12-na chu vawiin khan khuallian Health Minister Pu Lal Thanzara’n a hawng. He Conference, Tourist Lodge, Chaltlang a neih hian ni hnih chhung awhin, rorel leh hruaitu thlanna bakah training-a hun hman tur a ni.

Health Minister chuan Pharmacist te mawhphurhna chu khawvel hmasawn zelah mipui hriselna atan a sang tial tial a ni tiin, “damdawi chungchangah mipui kan thang harh mek zel a, damdawi nihphung, a hnathawh leh a nghawng te, a ei dan tur dik te hi mipui leh damdawi hmangtu te zirtir hi kan mawhphurhna pawimawh tak a ni a, chuvangin damdawi hriatna kawngah pawh hma kan sawn a kan in chhiar zaute pawh a tul tawh tak zet a ni,” a ti. Mizoram sawrkar chuan Pharmacist pawimawhna hria in Mizoramah ngei Pharmacy zirna, Diploma leh Bachelor Degree bawkah Master Degree thleng zirna a awm theih nan hma Iak a lo nih tawh thin thu te, tunah Private College, Diploma zir theihna leh, RlPANS-ah Master thleng zir theihna te Mizoramin a lo nei ta chu lawmawm a tih thu a sawi a ni. Pu Lal Thanzara chuan Pharmacist-te Hospital-a an pawimawhna chu nasa lehzual a an tihlan a duh tak zet a. Damdawi pek chhuah leh damdawi hriatna kawngah, Nurse leh Doctor-te pawh thurawn pe thei hial tura in zir reng turin a chah a. Pharmacist-te thiamna avangin Mizoram ramhmul damdawi, thlaite pawh zirchian chhoh mek zel a ni chu lawmawm tiin Minister chuan heng ramhmul damdawi thlaite hi zirchian deuh deuh a, a thatna hmuhchhuah tam chuan mi tam tak tana eizawnna kawng siamsak theih a nih tur thu a sawi a; Ram pawna thawn chhuah theih tur khawpin Pharmacist te hemi kawngah hian hma Ia zel turin a chah a ni.

Mizoramin damdawi siam chhuahna a la neih Ioh avangin, damdawi siamchhuah sa zawrh te chu a him leh him Ioh te, dik tak a zawrh leh lei a ni em tih te Pharmacist te chuan  an ngaihven reng tur a nih thu Minister chuan a sawi a. Ahmedabad leh hmun thenkhatah ISO certified company ni ve thlap si mahni duh ang ang leh, brand name duh ang ang siam tir mai theih company tam tak India ramah a awm thu tarlangin fimkhur a pawimawh thu a sawi a. Mizorama damdawi zawrh tura Io lut te pawh a chakna damdawi kawma in ziak ang a ni phak em tih enfiahna tur khawl sawrkar in a ngaihtuah mek thu Health Minister hian sawiin, sawrkar in hriselna a ngaipawimawh a mipuiin damdawi quality tha an ei ngei theih nan hma nasa takin a la mek zel thu a sawi a ni.

MGPA General Conference hi an President Pu H. Lalnuntluanga chuan a kaihruai a, Pu Lalbiakthanga, General Secretary chuan thusawina hun hmang bawkin pawl hmalakna pawimawh zualte a tarlang a ni. Chawhnu lamah rorelna neih a ni a. Naktuk (8.3.2018) hian “Use of Antibiotics” chungchanga training leh MGPA hruaitu thar thlanna in conference hi hman chhunzawm a ni ang.