No.2113/2021-2022

Aizawl, 3rd September, 2021 : Health & Family Welfare Minister Dr. R. Lalthangliana World Bank Group kaltlanga Mizoram hriselna ruhrel tihhmasawnna tur US $ maktaduai 40 hu “Mizoram Health Systems Strengthening Project (MHSSP)” chu vawiin khan Taxation Auditorium, MINECO-ah a hawng.

Vawiina MHSSP hawnna inkhawmah hian Dr. R. L althangliana chuan Mizoram sawrkar ding lai mekin mipuite hnena hriselna leh hlimna quality tha pek hi kan ngaih pawimawh ber pakhat a ni a, nunna chhanhim hi kan thupui ber pakhat a nih avangin Mizoram chhunga khawpui leh thingtlang khaw hrang hranga damdawi in kan neihte tihchangtlun bakah hmanrua leh damdawi tha zawka thuamte, thawktu chi hrang hrang daktawr, nurse leh healthcare worker bakah staff tul dang tha tak tak kan mamawhna phuhrukte kan ngai pawimawh em em a, heng kan mamawhnate hi MHSSP kaltlang hian tihhlawhtling turin theihtawp kan chhuah dawn a ni, a ti a. MHSSP tihhlawhtlinna tur hian Washington DC leh New Delhi a World Bank office te pawh amah ngeiin a dawr thin thute sawiin midangte entawn tlak leh zirchian tlakin hma kan la ang a, hna kan thawk dawn a ni, a ti.

Minister chuan tunkar chhunga New delhi-a sawrkar laipui a dawr chungchang tarlangin JICA sum cheng vaibelchhe 500 hmanga sak tur Zemabawka Cancer Superspeciality Hospital pawh hna thawh tan thuai theih a beiseiawm tawh tih a sawi a, American Embassy, New Delhi hotute nen an inkawmnaah health sector-a Mizoram tihhmasawnna tura thawhho dan tur an sawiho thu pawh sawiin hei hian rah tha a rawn chhuah ngei ka beisei a ni, a ti a. NITI Aayog member Dr. V.K.paul nen an inkawmnaah mizorama health sector tihchangtlunna tur project siam tura thurawn pek a nih thu leh Ministry of Tribal Affairs hotute pawhin hetiang bawka thurawn an lo pek thu sawiin, nasa taka hmalakna tur hmachhawp ka rawn hawn a ni, a ti a. ICMR Director-General Prof. Balram leh a thawhpuite nen an inbiaknaah Mizoram tan a thlawn liau liau a RT-PCR test kit leh bawlhhlo dang cheng vaibelchhe 20 chuang hu zet an peknaah lawm thu a hrilh tih sawiin, anni pawhin Mizoramin COVID-19 dona kawnga theihtawp an chhuahnaah lawmawm an tih thu an lo hrilh a, a tul anga thawhho chunzawm zel an ngai pawimawh tih Minister hi an lo hrilh a ni.

Dr. R. Lalthangliana chuan sawrkar laipuia thuneitute hnenah Mizoram University Southern Campus, Lungleia dinna tur a bawhzui thu pawh sawiin project cheng vaibelchhe 400 man (infrastructure leh human resources) an siam tawh thu leh anni lam pawhin an lo phurpui thu a sawi a, RUSA 2.0 hnuaia thawktute hlawh thla 6 vel zet tang tawh pawh reiloteah an rawn release dawn tih a sawi a ni. Kawrpuichhuah a Indo-Bangladesh trade centre chungchangah thuneitute an inhawng hle tih a sawi a, fencing hna thawh tan a nih thuai tur thu sawiin September ni 23 hian amah pawhin ahmunah a tlawh dawn tih a sawi a, hetih rual hian khawtlang lam hmun hrang hranga trade centre tura ruahmante a tlawh nghal dawn bawk a ni.

MSME hotute hnenah COVID-19 hripui vanga Mizoram sawrkar Flagship Programme SEDP duh anga an kalpui theihloh thu pawh Minister hian a thlen a, mizo thalaite hripui leng vanga an hna chan tam tak an awm thu leh eizawnna tlak thiamna zirtir an ngaih thu sawiin MSME hotute chuan thalaiten eizawnna tha tak an neih theihnan project lian tham deuha siam turin an lo chah a ni. Darzo kai Tuipui ‘D’ Lei metre 280 a thui leh Kawrpuichhuah Lei metre 600 a thui dawhna tur chungchang pawh Ministry of Road Transport and Highways Minister Gen. VK Singh-a hnenah thlenin ani chuan lo bawhzui zel a tum thu a lo hrilh bawk a ni.

Vawiina Minister-in a hawn tak Mizorama Health infrastructure tihchangtlunna tur hi Mizoram Health Systems Strengthening Project (MHSSP) under World Bank tih a ni a. Health & Family Welfare Department chu Implementing Agency (a thawktu Department) a ni ang a, kum nga (5) chhunga thawh tur a ni. US$ 40 Million man hu project niin, USD 32 Million (80%) hi World Bank-in an tum ang a, USD 8 million (20%) hi Mizoram sawrkarin a tum tur a ni a. A rulh dan tur chu USD 32 million atanga 90% hi Department of Economic Affairs (DEA), Ministry of Finance, Government of India-in a rul ang a, a bak zawng 10% hi Mizoram sawrkar in a rul ang.

March Ni 5, 2021 khan World Bank Office, New Delhi-ah DEA te nen Negotiation Meeting hlawhtling taka neih niin, Loan Agreement te sign nghal a ni a. GoI aiawhin Pu Hanish Chabbra, Director, DEA; World Bank aiawhin Pu Bathula Amith Nagarai, Senior Operation Officer, World Bank leh Mizoram State aiawhin Dr. Eric Zomawia, Project Director, MHSSP ten Agreement hi an sign a ni.

World Bank - Board of Executive Directors-in March ni 31, 2021 khan Mizoram Health Systems Strengthening Project hi a approve bawk a ni.

He Project in a tum ber chu Mizorama Health System kalphung tih changtlun leh tih hmasawn a ni.

MHSSP hian Component 4 a nei a, chungte chu:

Component 1: Strengthen Management and Accountability through Internal Performance Agreements (US $ 13.5 million):

Internal Performance Agreement hi State, District leh health facilities level a kalpui tur niin, agreement siam a ni ang a, Result based incentives (an hnathawh dan azira sum hmuh) hmuh theihna tur a ni a, indicators tur te hi duan mek a ni. Hemi in a tum ber chu Health facilities zawng zawng NQAS (National Quality Assurance Schme) certification hmu thei khawpa tih changtlun a ni.

Component 2: Improve Design and Management of the State Health Insurance Programs (US$2.5 million) :
Mizoram Health Insurance Programme kan neih leh PMJAY te tun aia tha zawk leh mipuite te tana hlawk zawka kalpui dan tur te ngaihtuaha duan ani ang a. Mipui tam zawkin Insurance Scheme a an tel ve theih nana hmalakpui a tel bawk.

Component 3: Enhance Quality of Health Services and Support Innovations (US$15.92 million):
Kan damdawiin leh thawktute hnen atanga enkawlna kan dawn te hi tun aia tha leh zuala tihchangtlun leh tihhmasawn tum a ni a. Heta ngaih pawimawh ber chu ‘quality’ a ni. Hei hian a tul dan a zirin infrastructure tih changtlun pawh a keng tel ang.

Component 4: Contingent Emergency Response Component (US$0 million):
Engemaw tul bik thil Emergency ah a chunga mite khi pawh pen theih an ni ang.

MHSSP hnuaiah hian a tul an ganga hma lo lak tawh niin - Project Management Unit atan individual consultancy mi 11 lak tawh an ni a. Consultancy Services/ firm Pali (4) lak tur te Contract ziahpui tawh niin, baseline survey/assessment nei tura inpeih fel thawkhat a ni tawh a. Hnahthial, Saitual leh Khawzawl district ah CMO office Building sakna tur atan contract sign niin hmalakna bultan nghal a ni a, input base financing hnuaia hmalakna bult?anna atan Civil Hospital Aizawl building te teh fel a, drawing siam that mek niin, Internal Performance Agreement (IPA tan mai thei turin inpeih fel thawkhat a ni tawh bawk a ni.

MHSSP atan hian Committee hrang hrang din tawh a ni a, chungte chu:

1. Project Steering Committee:
Chairman :Chief Secretary
Member Secretary: Health Secretary

2. Project Executive Committee:
Chairman : Health Secretary Secretary: Project Director

3. Project Management Unit:
Project Director: Dr Eric Zomawia, Mission Director, NHM Deputy Project Director: Dr Lalnuntluangi, DHS
Project Coordinator: Dr. Vanlalchhuangi, DHS