Health Minister Pu Lal Thanzara chuan vawiin khan nikum March thla atanga sak tan New Secretariat Complex-a Mizoram Nursing Council (MNC) Building thar a hawng.

Pu Lal Thanzara chuan India rama Nursing Council changtlung ber te zinga mi Mizoramin kan nei chu a lawmawm tak zet a, an hmalakna avangin Mizoramah nurse tha tak tak tam tak chherchhuah an ni tawh, a ti. Nurse-te chungah damloten rinna an nghat a, beiseina an nei sang em em a, tute lakah pawh hlim hmel pu tur leh zaidam taka damlote enkawl tura beisei an ni a. Hna hautak leh hahthlak, rim taka thawktute hi sawrkarin an mamawh a pe em tih te ngaihtuah tel a ngai, Minister chuan a ti a.

Health Department hnuaiah Directorate thar an dil mek pawh an neih thuai a beisei thu a sawi a ni. Health Minister chuan mipui hrisel zawk nana sawrkar hmalakna hrang hrang sawi langin chung zingah chuan tunhnaia sak zawh Lawngtlaia ANM School leh hostel building te; Mamit leh Zemabawk a ANM School building te; Thingdawla School leh Hostel Building te; Champhaia GNM School building te; Serchhipa GNM School; Chawlhhmun, Aizawl leh Sazaikawn, Lungleia Urban Public Health Centre te leh Hostel building bakah Saiha a GNM School building sak zawh thawkhat tawh te a tel a. Tun hnaiah Mizoram hmun hrang hrangah Sub-Centre Building 85 leh Quarters 116; Ware House 2 leh Dharamsala pahnih cheng nuai 2372 senga sak thar a nih thu Pu Lal Thanzara hian a sawi bawk. Health Minister chuan sawrkar hmalak mekna tarlangin Lungdai PHC leh Saiha Hospital sak mek a nih bakah khum 100 awm theihna tur Zemabawkah Cancer Hospital sakna tur pawisa dawn tawh a nih thu te, Lawngtlai Hospital leh Quarters sakna tur tender chhuah thuai a nih tur thu te, Kulikawn Mental Hospital sakna tur sum cheng vaibelchhe 50 dil mek a nih thu leh Health Services Directorate building sakna tur pawh a hmun tih fel veleh cheng nuai 650 pawisa awmsa a sak tan a nih tur thu Health Minsiter Pu Lal Thanzara hian a sawi a ni.

Mizoram nurse te hi kum 1991 hma lamah Assam Nursing Council hnuaiah an awm a. Mizoram Nursing (Registration) Act kum 1990 a neih a nih hnuah Mizoram Nursing Council lo dingin President hmasa ber chu khatih laia Higher & Technical Education Director Pu Lalawia a ni a, Registrar hmasa ber chu Health Worker Training School Tutor Pi Lalbiaksangi a ni. Kum 1994 atangin Council hnuaiah Nurse/Health Worker (ANM) exam tan a ni a, nurse-te diploma certificate pek an ni. Indian Nursing Council in kum 2000 atangin a recognise a, INC nen tha takin an inthlunzawm a ni.

MNC Building hawn tak len zawng hi a dung ft 60, a vang ft 30 a ni a. Floor 4 neiin a chung ber hi office atan hman a ni. Building sak nan a hranin fund an hmu lova, Council sum khawl sa atanga sak niin Rs. 64,67,748 an seng a ni.

Hawnna inkhawm MNC President leh Joint Director (Nurses) Pi Lalbiaksangi kaihhruaiah hian Mizo nurse te zinga MNC President hmasa ber Pi Thanpari Pautu chu khual zahawm a ni a. Health Principal Director Dr.K.Ropari leh MNC Vice President Pi Thandingliani ten thu sawiin MNC Registrar Pi Zochuanpuii’n building sak dan report a pe a. Hawnna inkhawmah hian Health Secretary Pu Lalrinliana Fanai bakah Health Department officer-te, nurse leh doctor engemawzat an tel a ni.