No.7088/2020-2021

Vawiin chawhnu khan Health & Family Welfare Department Minister Dr. R. Lalthangliana chuan Mizoram State Cancer Institute, Zemabawk a tlawh a. Hei bakah hian Zemabawk-a health department hnuaia hmalakna thenkhat leh Regional Institute of Paramedical and Nursing Sciences (RIPANS) a tlawh bawk.

Health Minister hian Mizoram State Cancer Institute, Zemabawk hmuna cheng vaibelchhe 8.8 man tur Cancer Hospital sak mek tlawhin an hnathawh dan a enfiah a, Cancer Hospital thar tur hi CB Engineers ten san in tunah hian hna 20% thawh zawh tawh a ni a, ruahman anga hna a kal tluan chuan kumin March thla hian sak zawh hman beisei a ni.

Cancer Hospital bula Tertiary Care Cancer Centre (cancer hemna khawlpui) pawh a tlawh nghal a, Tertiary Care Cancer Centre ah hian cancer hemna khawl lian cheng vaibelchhe 17 man Varian Medical Systems, USA kutchhuak leh khawl dang pakhat Brachy Therapy Machine bun a ni a. Tunah hian hna hautak zualpui thawh zawh tawh niin reilote ah heng khawlte hi hman tan theih beisei a ni.

Health Minister hian Cancer Hospital-a damlote eitur theirah thahnemtak a pe nghal bawk a ni.

Health Minister hian cheng nuaih 138 senga sak zirlai 20 awm theihna tur Zemabawk-a Auxiliary Nursing Midwifery (ANM) School hostel building sak mek a tlawh bawk a, he hostel building hi chhawng thum niin June ni 11, 2020 khan sak tan a ni a, luah theih tura peihfel tawh a ni. Auxiliary Nursing Midwifery (ANM) School-ah hian Pricipal telin zirtirtu 3 an awm a, COVID-19 vangin class tan theih a la ni lova, sawrkar ruahmanna ngaihchan mek a ni.

Regional Institute of Paramedical and Nursing Sciences (RIPANS) pawh tlawh nghalin Health Minister chuan Mizoram chhunga Institution zingah Mizoram sawrkar enkawl loh an awm nual a, amaherawhc hu heng zirna in te hi Mizorama mi a nih avangin a neitu chan kan chan a tul a, a chhiat a thatah enhrang lova theihtawp chhuaha kan puibawm reng a ngai a ni a ti a.  kum hnih kalta a RIPANS a tlawh tuma RIPANS tihmasawnna tur hna chi hrang hrang cheng vaibelchhe 480.12 hu - Academic Block-IV, Indoor Sports Complex a& Auditorium, Guest House, General Hostel Block, 100-bedded Speciality Hospital, Resident Doctor's Quarters (22 nos.), Medical Superintendent Quarters leh Staff Nurse Quarters (18 nos.) te chu Mizoram sawrkarin theih ang tawk tawk a a umzui ve reng thu sawiin, beisei anga hna a chak thei lo chu a vei thu a sawi a, Union Minister te pawh a dawr reng thu leh a tul anga a umzui reng thu a sawi a ni.

RIPANS Director Dr. H. Lalrinmawia pawhin thu sawiin RIPANS hmakhaw ngaitu leh thahnemngaihpuitu Health Minister kan nei him kan lawm takzet a ni, a ti a. A hnenah harsatna leh mamawh an thlen zin thu leh inhawng taka a lo dawnsawn thin avangte, State sawrkar enkawl ni lo mahse ralban san mai lova a tul ang anga sawrkar laipui9 lam a dawr sak thin avangin lawmthu a sawi a ni. Hmasawnna hnathawh tur zingah cheng vaibelchhe 217.97 man tur General Hospital chu tun kar tir khan  sak phalna an hmuh thu leh a satu tur pawh thlan fel a nih thu a sawi a, Speciality Hospital tur a nih avangin Mizoram tan pawh chhenfakawm tak a nih tur thu a sawi.

Health Minister chuan Chief Minister Pu Zoramthanga thahnemngaihna leh tanlakna azarah Health sector chu Mizoram sawrkarin  ngaihpawimawh (priority) berah a nei a, tunah hian cheng JICA fund atang cheng vaibelchhe 500 man Cancer Superspeciality Hospital pawh theihtawp chhuaha umzui zel a ni a, a kawng la thui viau mahse kan thlen chinah kan lawm rih zel a ni, a ti a. Nizoram Health Infrastructure tihhmasawnna tur cheng vaibelchhe 2500 vel man concept paper pawh sawrkar laipuiah thehluh fel tawh a ni a ti.

Health Minister hian Zemabawk-a Central Medical Store leh Food Testing Laboratory pawh tlawh nghalin an hnathawh dan leh an dinhmunte a enfiah a, MINECO-a cheng vaibelchhe 6 man Drug Testing Laboratory sak mek chu chak taka hmalak a nih thu sawiin, thawktute pawh lak fel vek tawh an ni a, tunah hian Food Testing Laboratory belh tel turin hmalak mek a ni, a ti bawk.

Minister hi Pu H. Lalengmawia, Commissioner & Secretary, H&FW bakah NHM Director Dr. Eric Zomawia leh Health department hotuten an tawiawm a ni.