Vawiin chawhnu khan Health & Family Welfare Minister Pu Lal Thanzara chuan Mizoram State AIDS Control Society (MSACS) hnuaia HIV/AIDS dona kawnga hmalakna thar ‘Test and Treat Strategy’ Aijal Club-ah a hawng. ‘Test and Treat’ hnuaiah hian HIV vei mekte leh HIV hrik pai hmuhchhuah thar te an CD4 Count engzat pawh ni se HIV enkawlna damdawi pawimawh tak Antiretroviral Therapy (ART) a thlawnin an dawng thei vek tawh dawn a ni. 

Pu Lal Thanzara chuan HIV/AIDS natna hian Mizoramah kua a hreuh thuk hle tawh a, kan hriat leh hmuh theih aia nasa hian min luhchilh mek a ni, a ti a. HIV/AIDS chungchangah kan ram hi dinhmun hlauhawm ah a ding mek a, Christian state ni chunga India ram state zinga HIV/AIDS vei tamna ber dawttu kan nih thu leh he natna hian hluar lam a pan zel chu pawi a tih thu a sawi a. Thinlung leh tih takzeta tangruala kan beih a ngai tawh tiin, kohhran, tlawmngai pawl, Health Department leh MSACS thawktute leh mitinte HIV/AIDS dopuiah Health Minister chuan a sawm a. HIV/AIDS  do na kawnga kohhran hrang hrang hmalaknate fakawm a tih rualin tun aia nasa lehzual a theihtawp chhuah turin Health Minister chuan a ngen a. 

Pu Lal Thanzara chuan HIV/AIDS do na kawnga sawrkar laipui policy duan thar ‘Test and Treat’ rang taka MSACS-in a kalpui nghal chu lawmawm a ti a, HIV enkawlna Antiretroviral Therapy (ART) chuan he natna kai leh vei mekte tana khawvel nuam zawk a siam theih a beisei thu a sawi a. ‘Test and Treat’ hnuaiah chuan HIV positive zawng zawng ten Antiretroviral Therapy (ART) a thlawnin an dawn theih tawh dawn avangin Mizorama HIV/AIDS do na kawnga rahbi pawimawh tak a ni thu a sawi a. Health Minister chuan HIV hrik pai tih inhrelo leh la hmuhchhuah loh te chu HIV/AIDS do na kawnga hmabak lian tak a ni tiin, mi tam thei ang ber test neih tir a tul a ni, a ti. 

‘Test and Treat’ hawnna inkhawm hi Pu Lalrinliana Fanai, IAS, Commissioner, Health and Family Welfare Department-in kaihruaiin thu a sawi bawk a, ‘Test and Treat’ chu World Health Organization (WHO)-in kum 2015-a HIV/AIDS enkawl chungchanga inkaihhruaina a siam zul zuia duan a nih thu kalkhawmte a hrilh a. Antiretroviral Therapy (ART) chuan HIV/AIDS ti dam theilo mahse HIV/AIDS vei te nun a pawhsei theih bakah natna dang kaihnawih TB leh bacterial disease-te lakah pawh an taksa a ti chak a ni, a ti. 

Dr. Lalmalsawmi Sailo, Project Director, Mizoram State AIDS Control Society (MSACS) pawhin thu sawiin HIV/AIDS do kawnga MSACS hmalakna tlangpui kalkhawmte a hrilh a. Dr. Richard L. Chawngthu chuan Powerpoint Presentation hmangin ‘Test and Treat’ strategy-hi a sawifiah bawk a ni. Dr. F. Lallianhlira, Principal Director, Health and Family Welfare Department chuan lawmthu sawiin huntawp a khar a ni. 

‘Test and Treat’ strategy neih hma hian sawrkar chuan HIV hrik pai CD4 Cell count 500 hnuai lam chu enkawlna damdawi Antiretroviral Therapy (ART) a thlawnin a pe a. He ‘Test and Treat’ strategy tan hnu hi chuan HIV hrik pai zawng zawngte CD4 Cell count engzat pawh ni se Antiretroviral Therapy (ART) damdawi hi a thlawnin an dawng thei vek tawh dawn a ni.