1596/2023-2024

Aizawl, the 22nd August, 2023: MSACS hnuaia New Bike Outreach kaltlanga District zawng zawng tuam chhuak tur Bike 11 leh AYUSH Health & Wellness Centre 38 a hman tur Mini Laboratory Services bungrua, Truck 16 hmanga sem chhuah turte chu tukin dar 7:00 khan MINECO Open Gym bul kawtzawl atangin Health & Family Welfare Minister Dr. R.Lalthangliana chuan tangkai taka hman turin a vai liam.

Dr. R.Lalthangliana chuan MSACS hnuaia Bike Outreach Service leh Ayush Health & Wellness Centre tihchangtlunna tur laboratory bungrua vailiamte chu hriselna kawnga hmasawnna, damreina leh nunna chhan nana hmalakna a ni tiin, hriselna kawnga bung thar leh thil chhinchhiah tlak tak Mizoramin a chuangkai chu lawmawm a tih thu a sawi a. Health Department hnuaia peng pakuate inthlunzawmna leh inlungrualna avanga hlawhtlinna hrang hrang hmuh chhoh zel a ni chu ropui a tih thu tarlangin, nunna hlu tak chhanna tura hmalakna a nih avangin Sawrkarin Health Department hnuaia hmalaknate a ngai pawimawh thin a ni tiin, hriselna chu hmasawnna tura pawimawh tak, sum leh pai thlenga nghawng nei a ni, a ti bawk.

Health Minister chuan MSACS Bike Outreach kalpui nan NACO in Bike a tum sak mai bakah PATH in thawktute rawihna tur a tum sak avangin lawmthu a sawi a. Thingtlang kilkhawr thlenga service thleng thei tur chuan awmze thui tak a neih ngei a beisei thu sawiin, Department hnuaia thawktute chu inpekna nena thawk tura chahin an thahnemngaihna chuan rah tha a chhuah ngei dawn a ni, a ti a. Ayush kaltlanga hmalaknate chhuanawm a tih thu sawiin, AYUSH Health & Wellness Centre-te hnena Laboratory hmanrua pek chhuahte chuan hmasawnna a thlen ngei a beisei thu a sawi bawk. Kumin March ni 31 ral hmain Health Sub-Centre 375 te Health & Wellness Centre-ah hlankai an nih thu leh heng zinga 38 te Ayush Doctor thutchilh an nih thu a sawi a. Health Sub-Centre neih lohnaah SEDP kaltlangin Health Clinic 235 din a nih thu leh thawktu leh hmanruate pek an nih thu a sawi bawk.

He hun hi Pi Esther Lal Ruatkimi, Principal Secretary, H&FW Department kalkhawmte lawmna thu a sawi a. Pi Betty Lalthantluangi, Jt. Director (Prevention), State AIDS Control Society leh Dr. S. Mara Thansiami, Dy. Director, Directorate of AYUSH te hnen atangin technical report ngaihthlak a ni a. Pu Robert Lalrempuia, SPO, PATH in lawmthu sawiin hun hman a khar a ni.

Tukin program hmanah hian H&FW Department atangin Dr. PC Lalramliana, Principal Director, Dr. Eric Zomawia, Mission Director, National Health Mission (NHM), Dr. Dr. Lalthlengliani, Project Director, MSACS leh Official dangte an tel a ni.

MSACS New Bike Outreach kaltlang hian hmun kilkhawr ber thlengpha HIV test, councelling, damdawi pek chhuah, HIV hridanna sem leh tul dangte thawh a ni dawn a, heng hnate hi Laboratory Technician te'n an thawk dawn a ni. Heng bakah hian mamawhna hmun leh high risk group miharsate an pan chilh thei bawk ang. Ayush Doctor thutchilh Health & Wellness Centre 38, hmun kilkhawr tak taka awmte hman tangkai theih tur Laboratory bungrua, thisen test leh adangte tih theihna tur hmanruate hi Truck 16 hmanga sem chhuah a ni.

National AIDS Control Program Phase 5 duhdan anga HIV kai za zela 80 a pawh hniam a nih theih nan HIV kai mahni dinhmun la hre lo te'n an hriat ngei nan HIV testing hi a hma aia nasa zawka kalpui a ngai a. Tun dinhmunah MSACS hnuaiah ICTC leh Mobile ICTC (HIV test-na) district tinah awm mah se, khaw kilkhawr zawk leh heng test-na hmun pan harsa ti an la tam avangin, bike outreach hi NACO ah thlen niin pawm a ni a. HIV kai te'n an dinhmun an hriat hma chuan enkawlna tha (ART) an ei hma anga, hei hian an hriselna bakah midang kaichhawn kawngah thui takin kawng ro a su a ni.

HIV kaisam tura ngaih High Risk Group (HRG) zingah thisen test tha duh lo, chhuanlam siam avanga ICTC a hruai thlen theih lohte bakah awmna hmun hlat avanga ICTC thlen harsate tan he Bike Outreach hi buatsaih a ni a. High Risk Group ni lem lo, thisen test duh, a test-na hmun pan harsate tan pawh ruahhman a ni. Hemi mai bakah hian HIV hri darh zel tur venna hmanruate a mamawh tan an sem bawk ang a, ART damdawi, hmun hla zawka awmte tan a remchan dan anga sem tum a ni bawk a. HIV positive, ART a inentir thei lo te tan ART an lak tan theih nan Bike Outreach hian hma a la tel dawn bawk a. ART ei tha tawh hmun hla zawka awm viral load test harsa ten a hun taka an test theih nan hmalak tum a ni bawk a ni.

Health & Wellness Centre-a Ayush Doctor dah te'n hun khawhral lova natna an hriatchhuah hma lehzual nan Laboratory hmanrua, thisen, zun leh test tul zual an tih theih nan Ayush Health & Wellness Centre-te hi thuam mek niin tukina bungraw thawnchhuahte pawh hetiang atana hman turte an ni a. Natna hriatchhuah hma leh a hun taka chêt lâk hian nunna a chhanhimin, tul lova refer leh sum senna a tiziaawm phah dawn a ni. Ayush Health & Wellness Centre-ah hian Sub Centre hamlakna pangngai an kalpui bakah Ayush Service pawimawh tak takte an pe chhuak bawk a ni.