Nimin chawhnu ah khan Health Minister Pu Lal Thanzara chuan natna khirh tak, enkawl dam har tak, autism vanga pianphunga rualbanlo-te enkawlna school chu falkland veng a Gilead Special School ah a hawng a. Healh Minister hi Chief Information Commissioner(CIC) Pu Lal Dingliana, IFS (Rtd.) leh mipawimawh dang ten an tawiawm a ni.

Autism hi khawvel pumpuiah pawh vei an tlem a, enkawl a hautak in hetiang natna vei naupang pakhat tan hian zirtirtu pakhat a ngai a sawi a ni a. Gilead Special School a hawn tak Autism School/class hi Spastic Society of Mizoram leh Com DEALL te thawhhona a din a ni.

Autism enkawlna sikul hawngtu Health Minister Pu Lal Thanzara, Spastic Society of Mizoram a Vice Chairman ni bawk chuan Autism natna khirh tak veitu tana enkawlna hawn a lo ni ta chu he natna veitu leh chhungte tan hahdamna a nih bakah sawrkar tan pawh hmasawnna a ni a ti a. He natna khirh takin a tihbuai leh an chhungte chu lungngaia in dawm kun mai lovin beiseina nen helai hmun hi pan nachang hre turin a chah a. He society tan hian mipui vantlang pawh in an theihna leh sum leh pai te pawh rawngbawlna a ngaia te lua leh lian lua awmlova seng hreh lo turin a sawm bakah sawrkar pawh he rawngbawlna ah hian a in hawng a, he sikul enkawltute pawh an mamawhna ah chuan sawrkar be thin se a duh thu a sawi a ni.

Thusawitu dang CIC Pu Lal Dingliana, IFS (Rtd.) pawhin autism natna bik ah tawn hriat a lo neih ve tawh te leh enkawlna an kalpui thin dan te tarlangin Autistic Children khawvel ram changkang zawka an enkawl thin dan te video a record a neih te pawh Gilead Special School hnenah hian a hlan a. Mizoram ah he natna khirh tak mai veitu te tan sikul hawn a lo ni ta hi chanchin lawmawm em em leh he natna in a tihbuaite tana beiseina eng a ni a ti.

School/class room for autistic children hawnna programme hi Spastic Society of Mizoram a Chairman Pi Zokhumi Vankung leh hruaitu dang ten an kaihruai a. Commissioner for people with disabilities Pi B.Sairengpuii, AMC hruaitute- Pu Zarzoliana, Chairman, Pu Lalrinenga Sailo, Vice Chairman leh Pi M.Zohmingthangi, CEO te bakah mi pawimawh tak tak te he hunah hian an tel a. Autism School tanpui nan hian Health Minister Pu Lal Thanzara'n ama sum Rs.50,000/, AMC in Rs.20,000/- CIC Pu Lal M Dingliana'n a ma sum tam tham tak, Pi Neihthangi, Zote Bakery netu in Rs 5,000/- leh mithahnem ngai dang ten sum fai an pe a ni. Autism School/class hi naktuk atang hian kalpui nghal a ni dawn a ni.