Vawiin chawhma khan Govt. Primary School, Mission Vengthlang-ah NCD (Non-Communicable Diseases) chungchang awareness campaign leh Free Clinic neih a ni a. He hunah hian Health Minister Pu Lal Thanzara chu Khuallian niin NHM Mission Director, Dr. Lalrozama, IAS chu Khualzahawm a ni a. He hun hi Aizawl South II MLA, Lt. Col. Z. S. Zuala chuan a hmanpui bawk a. National Programme for Healthcare of the Elderly (NPHCE), National Programme for Prevention and Control of Cancer, Diabetes, Cardiovascular Disease and Stroke (NPCDCS), National Programme for Prevention and Control of Deafness (NPPCD) leh Mission Vengthlang MUP tangkawp buatsaih a ni.

Khuallian Pu Lal Thanzara chuan mipuite tan hriselna lama taksa enkawl dan tur zirna hun ruahman a ni chu lawmawm a tih thu sawiin hemi zirtirna neih a nih hnu hian doctor thiam tak tak hnenah a thlawna inentirna hun a awm nghal tur thu a sawi a. NCD chu kan nunphung leh kan thil chin than (habits) zir loh atanga lo awm a nih thu a tarlang a. Ei leh in lamah fimkhur a tul thu sawiin ‘kan ei leh in azir hian kan taksa hriselna leh hrisel lohna a innghat a ni’, a ti a. Tun hma ngaihtuahin mizote kan changkang chho zel a, hemi kan changkanna hian kawng lehlamah ei leh in uluk lohna leh awm awlna a thlen a, hei vang hian natna tam tak kan vei phah a ni, a ti a. Keimahni theuhah hian kan hriselna a innghat thuk hle a ni tih kan hriat reng a ngai a ni, a ti a. Kan lo upat hnu hian kan taksa pawh kan enkawl that a, kan invawn a ngai zual zel a ni, a ti a. Free Clinic tha tak nei turin duhsakna a hlan nghal bawk a ni.

Natna hrang hrang inkaichhawm theih loh chi, natna benvawn ho- Cancer, Zunthlum (Diabetes), BP Sang (hypertension), Lung leh Thisen zam natna (Cardiovascular Disease), Stroke, khuh benvawn (COPD) sawi nan NCD hman a ni thin a. NCD thlen theitu pawimawh palite chu- Vaihlo te, awm awl lutuk te, chi ei tam lutuk leh sa ei hnem lutuk te, zu in nasat lutuk te an ni. NCD Clinic hi Hospital leh CHC hrang hrangah a awm tawh a ni.

Mission Vengthlang MUP President, Pu Nghaklianmawia chuan kalkhawmte lawmna thu a sawi a. NCD leh NPPCD chungchangah State Nodal Officer (SNO) Dr. Eric Zomawia chuan zirtirna hun a nei a. NHM Mission Director Dr. Lalrozama, IAS chuan thu a sawi a. Programme hi Free Clinic hian a chhunzawm nghal a. Blood Sugar leh BP test, Pap Smear test bakah beng, physiotherapy leh diet chungchang thlenga inentir theih niin damdawi pawh a thlawnin a theih chinah sem a ni a. Mi 300 chuang he hunah hian an kalkhawm a ni.