Vawiin chawhma khan Health Minister Pu Lal Thanzara chuan a Office ah Nurse Association hrang hrang hruaitute kawm in sawrkar hmalakna tithuanawp zawng hma la tawh lo turin a ngen a. Nurse pawl hruaitute chuan an lungawi lohna te leh an thil phut chung chang te sawi fiah in Health Minister ngenna anga an nawrh tihtawp an rem ti a ni.

Nurse pawl hruaitute chuan MPSC Office leh a chhehvel a poster intar chungchang chu an hriatpui loh thu leh pawi an tih thu an sawi a. Inhriatthiam tawk lohna avanga Exam buatsaih-ni a exam ve theilo te an exam leh theih nan sawrkar in Exam hi buatsaih that sak leh tur in an ngen bak ah Nurse hna lak a nih in Nurse graduate senior zawkte chu duhsak ni thin se an duh thu an sawi a ni.

Health Minister chuan Nursing Examination chungchang ah chuan Exam buatsaihtu MPSC chu thuneihna tawp neitu a nih bak ah Autonomous body a nih avangin Sawrkar in a duh ang anga thu a pek theih a ni lo a ti a. MPSC chunga lungawilohna lantir chu a kawng hmang lova, buaina siam tute phei chu exam theih tawh ngai lo tur hial in MPSC hian aduh a, zah a ngai lo a nih phei chuan a blacklist thei a ni a ti a.Nawrh huaihawt tu Nurse Association hruaitu zingah leh buaina siamtute zingah Sawrkar hnuaia Contract Nurse tam tak an tel chu dan bawh chhiatna a nih thu sawiin phalna la hmasa chuan Secretary aia hnuai tan chuan press conference huaihawt leh chanchinbu mite lo kawm a thiang lo a ni a ti. Sawrkar hmalakna ti bahlah zawnga harsatna siam thin sawrkar hnathawkte chu dan anga hrem theih an nih thu a sawi a ni.

Meeting-na a sawrkar aiawh a thusawitu dang Health Department Principal Director Dr K.Ropari pawn Nurse pawl hruaitute chu an tih miah loh tur ti ah a ngaih thu a sawi a. Sawrkar in hnalak khapna a chhuah hnuah pawh Staff Nurse mamawhna a san em avanga Post 70 lai lak phalna a siam hi thil lawm awm tak a nih tawh laia dodalna a lo awm ta mai hi thil pawi tak a ni a ti a. Post 50 lai chu thuneitu pakhat thutlukna mai pawh ni lo, Cabinet meeting hial in ngun taka a ngaihtuah hnu ah Interview hmanga dah khah turin a rel a, chu chu nurse contract a thawk mek te tan chuan thil lawmawm tak a ni tawh a, post 20 exam kaltlanga a buatsaih hi thil tihawm tak pawh a ni zawk a ni a ti.