No.2312/2020-2020
Health Minister Dr. R. Lalthangliana chuan vawiin chawhnu dar 2:00 khan SAD Conference Hall-ah Press Conference kovin COVID-19 do kawnga Health Department hmalakna leh hnathawh chi hrang hrang a sawifiah a, Health Minister hi Medical Operational Team on COVID-19 Chairman Dr. ZR Thiamsanga, Dr. K .Pachhunga, MLA, Prof. F. Lalnunmawia, MLA bakah Finance Commissioner Pu Vanlalchhuanga, Health Secretary Pu H. Lalengmawia leh Health department leh I&PR Department hotuten an tawiawm a ni.

Press Conference ah hian Health Minister chuan COVID-19 hmachhawn tura Health department inbuatsaih dan sawifiahin Sawrkar Laipuiin inralrinna dar a vuak veleh rang takin COVID-19 hmachhawn dan tur ngaihtuahin January ni 30 khan thutkhawm nghal a ni a, Lengpui Airport screening leh ramri luhka zawng zawnga screening point din bakah State, District leh Village/Local Level Task Force din nghal rel niin rang takin bawhzui a ni a, February ni 6 ah Lengpui Airport screening tih nghal niin India ramah Airport screening ti hmasa ber kan ni a, Zokhawtharah February ni 3 ah screening point din niin February thla laihawl velah chuan ramri luhka zawng zawng deuhthawah screening point siam a ni a ti. Lengpui Airport ah thermal camera hmanga lo haw te endik an nih bakah RAT leh throat swab sample lakna ruahman a nih thu te, India rama a titha ber pawl an nih thu a sawi.

RT-PCR hmangin April ni 7 atang khan ZMC –ah sample test tih tan a nih thu sawiin, Pooled sampling method hmangin ni khata kan test zat pawh a tam sawt chho viau a. Kar kalta khan Automated RNA Extractor leh PCR khawl rawn thleng tharte kan han bun fel chhung ni hnih khat vel kan khaihlak zeuh tih loh chu ni khatah sample 600 chuang kan test ziah thei ta a ni, a ti a. Swab sample test hi theihtawpchhuahin tih a ni a, ZMC Lab a thawktute pawh an rim em em a, zing dar 9 atanga thawkin tlaivar deuhthaw in an test reng a, a hmunah an riahchilh hial a ni a ti a. Tun anga tluang taka test kalpui a nih chuan tun kar tawp lam hian sample lak sa zawng zawng test zawh vek theih a nih a beisei thu a sawi.

Ambulance chungchang sawiin sawrkarin 50 chuang a nei a, Mizoram hmun hrang hrangah darhsarh takin sem zai a ni a. Tangkhang rawn haw runpui lai khan Aizawl leh Lunglei mipui tam zualna District Hqrs. ah ambulance indaihloh vangin harsatna kan nei lek lek a. COVID-19 veite ambulance hmanga phurh an ngaih thin avangin kan Hon’ble Chief Minister phei chuan “kan lei mai dawn em ni?” a tih mek laiin zirtirtu pawl intelkhawmin ambulance pasarih lai sorkar an rawn pe hi a lawmawm em em a. Ambulance indaihlohna pawh engemawchen min chhawk zangkhai ang. Tunah hian NEC kaltlangin ambulance 3 kan chah mek bawk a ni, a ti a. Chief Minsiter-in min ngaihsak a, COVID-19 dona tur a nih chuan kan mamawh engkim min tihsak zel a. Sum leh paiah harsatna tawk lovin tun thleng hian kan kal chho thei zel a. CM, pa chanchang, pa nih tlin tak kan nei hi kan vannei a ni, a ti.

Health Department-in Rs. 132 lakh Finance Department a an dil chungchang sawifiahin, kum dang aiin kumin khan budget session kan nei hma a. Finance Department-in Assembly-a budget pharh (February ni 19) a nih hmain budget bu siam te a ngaih avangin inhmakhawsuih an duh thin a ni,a ti a. Hetih mek lai hian COVID-19 hripuiin India ram a rawn thlen tan tak avangin February ni 3 khan he hripui laka lo invenna tura mamawh hrang hrang leina turin Finance Department-ah Rs. 132 lakhs dil a ni a. Finance department lam hi budget present tur hian inbuatsaih fel vek tawh an nih avangin kan pawisa dil hi in pek nghal ngaihna a awm lova. Mahse kan Chief minister-in min hrethiamin a ngai pawimawh em em a. March 4, 2020 chawhnu herah budget session zawh a ni a. Danin a phal veleh hemi ni la la tlai lamah Finance Minister ni bawk kan Chief Minister-in kan mamawh ang te min pe nghal a ni, a ti a. Thu belhchian dawllo sawi chhuah fo a tullo tih a sawi.

Health Minister chuan rin aiin COVID-19 hian ken tel a ngah a. Sum senna tur a tira kan lo thlir lawk dan nen a inperhsan ta hle mai a. Health chauh kan ni lo, dept dang dang pawhin COVID-19 kaihhnawiha sum an hmanna a tam em em mai a sawi vek sen a ni lo. Amaherawhchu, tun thlenga harsatna kan la nei lo hi Chief Minister vang liau liau a ni, a ti a. Kan Chief Minister zahawm tak hian Department in kan mamawh leh sawi a piang min pe zel a, kan lawm takzet a, a kaihhruaina hnuaiah kan thawhhona hi a tha em em a, a nghetin a tlo tulh tulh bawk ang, a ti.

Dr. K. Pachhunga, MLA leh Prof. F. Lalnunmawia ten RT-PCR khawl bun chungchang sawifiahin mimal tlawmngai ten khawl thar donate an duh a a lawmawm rualin a khawl hrim hrim lei ringawt hi a ni lova, a bawlhlo leh thil dang tam tak ken tel a neih bakah, a khawl dahna tur hmun te pawh uluk taka ruahman a ngai a, institution based a nih loh phei chuan ICMR hian nikhatah sample 100 tal an test loh chuan licence a tihtawp sak dawn si a, COVID-19 reh hnu bakah COVID-19 awmlai ngei pawhin nikhata 100 test theihloh hun a la thleng thei a, chuvangin ngaihtuahna uluk taka kan sen a ngai a ni, an ti a. TrueNAT khawl hi (automated machine) TB- enna khawl kan tih thin kha ani a. ICMR pawhin, Covid -19 test/exam nan a pawm thlap tawh a. Khai sawn theih niin, Biosafety level 3/2- laboratory ni kherlo, Laboratory changkang lutuk lovah pawh hman theih a ni a. Nimahsela, RT-PCR angin, test leh exam a chak lova. He khawl hi a len leh tet a zirín- single channel leh four- channel (Quotro machine) a awm a. Quotro machine hian, nikhatah sample 45-50 a test thei a. He khawl hi district Hospital tinah awm thei sela, thil duhawm tak ani ang, an ti a. Thawktu leh Laboratory pawh,RT-PCR lian angin a duh hautaklo deuh a. Covid-19 hripui hi lo reh pawh nise, he khawl hi kan hmang tangkai thei zel dawn a. TrueNAT-Quotro machine/khawl hi mihring natna chi hrang hrang-16 lai test leh exam nan a hmanzui theih a ni, an ti.

Health Secretary Pu H. Lalengmawia pawhin COVID-19 dona atana Health Department sum hman dan leh hmuh dan hrang hrang sawifiahin, tun thlengin Rs. vaibelchhe 21.27 hman tawh a nih thu a sawi.

Finance department in kar hmasa a Health department an audit chungchang zawhna chhangin Finance Commissioner Pu Vanlalchhuanga chuan internal audit a ni a, politics thil engmah a inrawlh lova, Chief Secretary kaihhruai State Executive Committe in Health department in COVID-19 dona kawnga sum an hman leh an la hman leh zel turte felfai zawka an ruahman a, an inchinfel theih a tul a tih vangin hun rei deuh tawhah khan internal audit neih nise tih a rel a, hemi bawhzuina zawk hi a ni, a ti a. AG in external audit a neih hunah felfai taka an lo hmachhawn theihna tura an lo inhmakhawsuih theihna tur zawk a ni e, a ti a. A tul angin sum an mamawh ang pek belh an la ni zel zawk dawn tih a sawi a. Internal Audit hi kalphung pangngai, thil mak tak anga sawi hluai tur a nih lemloh thu a sawi a ni.