No.4066/2021-2022

Aizawl, 21^st February, 2022 : Vawiin tlai khan Health Minister Dr R. Lalthangliana chuan Regional Institute of Paramedical and Nursing Sciences (RIPANS), Zemabawk tlawhin sawrkar laipui atanga RIPANS tihchangtlunna tur project hmuh kalpui mek a hmunah a enfiah.

RIPANS tihchmasawnna leh tihchangtlunna atan hian sawrkar laipui chuan cheng vaibelchhe 480.12 a ruahman a, heta tanga cheng vaibelchhe 217 hi building hrang hrang sakna tur niin a bak zawng hi PG Course 7 hawn thar belhna tur leh thawktu mi thar 154 lakna senso leh hlawh tur a ni a, heng thawktu thar lak pawh hi sawrkar laipuiin a phalsak vek tawh a ni.

RIPANS a building sak mekte hi Academic Block-IV chhawng 5 a sang, Auditorium mi 1000 len theihna, Guest House pakha – bedroom 8 leh suite 2 awmna, PG zirlaite awmna tur General Hostel room 168 awmna, khum 100 awmna Hospital tunlai khawl changkang ber ber hmanga thuam tur, Resident Doctor te chhenna tur quarters 22, Staff/Nurse quarters 18 an ni a. hna hi kum 2021 march ni 1 atanga thawh tan niin, ruahman ang chuan thla 24 chhunga zawh tur a ni a, amaherawhchu hripui leng vanga harsatna hrang hrang tawh a nih vangin a hun takah hi chuan an zo fel hman dawn lo niin contractor te hian an sawi a ni. He project hi IIT, Roorkie ten an duang a ni.

Health Minister Dr R. Lalthangliana chuan RIPANS tihchangtlun hi Mizoram sawrkarin a ngaih pawimawh thu sawiin, Health Minister chanvo a lak veleh amah ngei pawhin sawrkar laipui lamah a bawhzui nghal tih  a sawi a, theihtawpchhuaha kan tan tlanna zarah February ni 28, 2019 khan kan nawr chhuak ta a ni, a ti a. Zembawkah JICA sum hmanga Cancer –Superspeciality Hospital sakna tur cheng vaibelchhe 500 pawh sawrkarv laipuiin a pawm fel tawh thu leh kumin chhunga hna thawh tan beisei a nih thu sawiin, Mizoram State Cancer Institute chhungah Cancer Hospital building thar pawh kan hawng leh tawh a, Cancer hemna khawl lian LINAC pawh kum kalta khan Chief Minister Pu Zoramthanga’n a lo hawng tawh a, cancer hemna khawl dang Cobalt Therapy kan neih sa pawh a hlui tawh avangin thlak kan tum a, khawl thar tha ber chi in reilote ah kan thlak fel thei tawh dawn a ti bawk. Contractor te pawh theihtawp chhuaha tan la turin a chah a, sawrkar laipuiin sum zawng zawng a tum avangin harsatna a awm lo turah kan ngai a, Zoram mipuiten a hlawhtlin hun kan nghakhlel a ni, a  ti.

RIPANS Director Dr. H. Lalrinmawia pawhin thu sawiin RIPANS hmakhaw ngaitu leh thahnemngaihpuitu Health Minister kan nei him kan lawm takzet a ni, a ti a. A thayhnemngaihna vang liau liau a he project hi nawr hlawhtling kan ni a, anhlawhtlin hunah chuan tuna an course neih laite pawh tichangtlun belh a nih tur thu a sawi bawk a ni.

Minister hi Dr T. Lalhmangaihi, Director, Hospital & Medical Education in a tawiawm a ni.