Health & Family Welfare hnuaia National Health Mission peng pakhat ‘Rashtriya Bal Swasthya Karyakram’ (RBSK) leh Manipal Hospitals, Bangalore te tangkawp chuan ‘Screening Camp for Congenital Heart Disease’ an buatsaih chu vawiin khan Health Minister Pu Lal Thanzara’n DEIC Aizawl West, Kulikawl-ah a hawng.
Screening Camp hawnna inkhawm National Health Mission Mission Director Dr.Lalrozama kaihhruaiah Khuallian Pu Lal Thanzara chuan NHM, Mizoram leh Manipal Hospitals, Bangalore ten kumin August ni 28 khan pian tirh atan lung natna (congenital heart disease) enkawl dan tur chungchangah inremna an lo ziak fel tawh a, chumi bawhzuia vawiina Screening Camp neih theih a ni chu a lawmawm takzet a ni, a ti. H&FW Department hmalakna pawimawh tak pakhat chu RBSK hnuaiah hian nausen pianghlim atanga kum 18 inkarte hriselna endik thin niin, natna chi hrang hrang 30 thlanchhuahte en bik a ni a, chu mai bakah natna thlanchhuah ni ve lemlo te pawh naupangin an vei em tih chhinchhiah tel thin niin, RBSK record atangte hian naupang ten eng natna nge an vei tam ber tih a la hriat theih dawn a ni, a ti. Heng natna zawnchhuah hna thawkin Hospital, CHC/PHC leh Sub-Center bakah sorkar sikul leh anganwadi center-ah te Mobile Health Team an kal reng a, chuvangin Team-te kalna apiangah nu leh pa ten lo bengvarin an fate entir hram turin a chah bawk. Sorkar kum kallai April-August 2017 inkarah RBSK hnuaia naupang hriselna endiktu Mobile Health Team ten naupang 1,14,138 an endik tawh a, chung zingah chuan pian tirh atanga lung natna nei naupang 12 hmuhchhuah an ni tih a tarlang bawk.
Health Minister chuan thu a sawi zelnaah RBSK hnuaiah hian natna khirh zual (zai ngai) 13, programme-in a puih theih tur thlanchhuah sa a awm a, chung zingah chuan ‘congenital heart disease’ hi a tel ve a. He natna neisaa lo piangte chu a hun taka enkawl dan tur dik taka enkawl an nih chuan harsatna nei zui lovin an dam khawchhuak thei a, chuvangin vawiinah hian pian tirh ata lung natna nei an ni nge nilo finfiah turin Screening Camp hi buatsaih a lo ni ta a; he natna neite hi hmuchhuak a, hlawhtling taka enkawl an nih theih nan duhsakna sang ber a hlan a ni.
Screening Camp for Congenital Heart Disease chhunga pian tirh ata lung natna nei zai ngaite an lo awm a nih chuan Manipal Hopsitals, Bangalore-ah a thlawnin an enkawl dawn a. Kalkawng man erawh chu RBSY emaw Mizoram Health Care Scheme-a in-register te tana scheme-in a pek theih zat an bill thei ang a, in-register lo tan chuan kalkawng man hi mahni intum chawp a ngai thung ang.
