Chawhma dar 11:00AM hian Health Minister Pu lalrinliana Sailo chuan, National Vector Borne Diseases Control Programme(NVDCP), New Delhi atanga dawn thosilen tha chi Long Lasting Insecticidal Net(LLIN) chu Secretariat Complex Ground atangin a vai liam.
He hun hi Dr.C.Lalthanmawia, Director of Health Services in a kaihruai a.Heng thosilen vailiam a nih hma hian thusawiin Health Minister chuan Malaria hi Mizoten kan thihpui tam thin a ni a, thawktute thahnemngaihna leh remhriatna avangin tunah chuan malaria avanga thi pawh kan lo tlem sawt ta hle a ni a ti. Hemi kawngah hian a invenna lam kan uar a ngaih thu te, mitin te, thosi pian theihna tur a tui tlin theihna leh tawphnawk ang chi te kan in leh a velah awmtir lovang u a tiin a chah bawk. Mitinten hriselna tha kan neih theih nana kan invawnfai hi harsa lo tak kan tih mai theih a ni a, keimahni tan mai bakah ram tan kan thawk a ni tih i hre thar leh theuh ang u a ti bawk. Tun hnai maiah Mizoram chu small state zingah hnathawk tha bera thlan kan ni a, hei hi duh tawk mai lovin hnathawktute pawh tanla lehzuala Central lamah te project siam thiama kan state mamawh tur ang te haichhuak thiam turin a chah bawk a ni. Thu a sawi zawh hian Minister chuan mipuite hnena hetiang thosilen tha tak mai pekchhuah leh theih a ni chu lawmawm a tih thu leh tun aia nasa lehzuala nunna kan chhan theih ngei a beisei thu leh Malaria avanga thihna pawh kan pumpelh theih phah ngei a beisei thu a sawi a. Hemi zawh hian thingtlang hmun hrang hranga semchhuah tur chu a vailiam a ni.
Dr.Ramfangzauva, Joint Director, Malaria pawhin report pe in Central lamin Malaria laka kan lo him theih nan kum 2010-2011 chhung atan Mizoram puma hman tur Thosilen chiah sa(LLIN) nuaih khat min rawn pe a, hengte hi khaw thlanchhuah bikah Health Department hnuaia BPL chhungkuaten 2 theuh dawng thei tura ruahman a ni, a ti. Heng thosilente hi Fever Treatment Depo/Accredited Social Health Activist leh Christian Medical Association of India hnuaia Community Health Volunteer ten an biala BPL chhungkuate hnenah a thlawnin an sem dawn a ni.
LLIN hi a siamna hmun atanga damdawia chiah lawksa vek a ni a, pakhat hi Rs.500/- man angin Mizoram-ah a lo thleng thei a ; he thosilen tha chi, damdawia chiahsa ni bawk hi kum 3-5 chhung chu vawi 20 suk daih tura ngaih a ni. Kum 2009 LLIN hman a nih atang khan Malaria avanga thihna nasa takin a tlakhniam phah a ; chhungtinten zan mutnaah thosilen zar uar theuh turin mipuite a chah bawk.
