No.7574/2020-2021

Kum 1914 a din Zampui tlangdunga Tlangsang khua chuan kum 107 an tlinna (Tlangsang Day) lawmni khamin ni hnih chhung ropui takin an lawm a, a ni hnihna vawiin February ni 19, 2021 hian Health & Family Welfare Minister Dr. R. Lalthangliana'n khuallian niin a hmanpui.

Tlangsang kum 107 tlinna pual inkhawm buatsaihah hian khuallian Dr. R. Lalthangliana chuan thu sawiin COVID-19 hripuiin khawvel a tuam mek laiin Mizoram chu India ram state zawng zawng zinga a tuar nep ber a ni a, hei hi a chhan chu Zoram pawn zofaten Mizoram hmangaih taka theihtawpchhuaha min tawngtaisakna rah a ni tih Zoram mipuiten kan hria a ni, a ti a. Khawvel hmun hrang hranga zofate inunauna sawhngheh hi Mizoram sawrkar tum pawimawh berte zing ami a ni tih sawiin, khawvel ramri kham hian kan inlaichinna leh inunauna hi a dal tur a ni lova, engtiklai maha inthlahthlam thiang kan ni lova, inpumkhat kan nihna hi kan chawi nung reng tur a ni a, kan tu leh fa, chhuan lo la awm zel turte pawh kan chah nawn fo a ngai a ni, a ti.

Khuallian Dr. R. Lalthangliana chuan Zampui tlangdunga Mizo khuate hian taimakna leh tlawmngaihna an hmingthanpui a, entawntlak an ni tih sawiin, thalaite chu zofate mamawh thiamna pawimawh bik chi hrang hrang ngaihtuah chunga rilru siam turin a fuih bawk a ni.

Kum 1975 May ni 3-a kum 26 mi ni a Tlangsang khuaa Mizoram tana a nunna hlantu Cpl. Vanlalchhuanga Hnamte, Thenzawl thlan tlawhin amah hriatrengna thlanlung Tlangsang khuain an phun chu a hawng bawk a ni.

Tlangsang khaw hruaitute, Tripura Group YMA leh Mizo Convention, Zampui Hill, Tripura ten chawimawina thuziak an hlan bawk a ni.

Tlangsang khua hi Raja Hrangvunga'n kristian khua ni turin kum 1914 khan a din a ni.

Health Minister hian Tlangsanga hun a hman zawh hnuin Behliangchhip-a Calvary Healing Centre a tlawh a, oxygen generator a hlan a ni.

Calvary Healing Centre hi ruihhlo ngaite enkawlna hmun (de-addiction centre) atana kohhran leh tlawmngai pawl hrang hrang ten kum 2019 a an din a ni a. Tunah hian staff nurse leh part time doctor counsellor ten thutchilhin khum 20 in bul tan a ni a. Zampui tlangdung mipuiten a tul anga an thawhkhawm hmanga enkawl niin, he hmuna awm man hi lak a ni lo. De-addiction period hi thla 5 niin, hemi hnu hian thla 3 chhung rehabilitation & moral reforms period a tel bawk a. He hmuna awmte hi an tuina zawng thiam thil zirtir thin an ni.

Minister hi Road & Infrastructure Development Board Vice-Chairman Er. H. Lalzirliana, MLA, ZOHANDCO Chairman Pu C. Lalrammawia, Mamit district bawrhsap Dr. Lalrozama leh sawrkar mi pawimawh dangten an tawiawm a ni.