Vawiin khan Synod Conference Centre, Mission Vengah Health Minister Pu Lal Thanzara’n kum hnih dana neih thin Trained Nurses Association of India (TNAI) Mizoram Branch Biennial Conference vawi 18-na a hmanpui.
Pu Lal Thanzara chuan nurse-te chu mahni inphat a midangte tana malsawmna thlentu, midangte tanpui leh enkawl a, damlo chau leh beidawngte tana beiseina siamsaktu an ni, a ti. Mizo nurse-te fakin ram chhung hmun dang leh ram pawna hospital liante thleng pawhin Mizo nurse -te an duh hle thin chu lawmawm a ti a, khawi hmunah pawh Kristian Nurse-te awm dan tura awm a, midangte tana entawn tlak nih tum turin a fuih a ni. Thawktu indaihlohna karah thahnemngai leh hah takin, phunnawi lovin damlo harsa zawkte an tanpui thin a, awka ngaihnobei leh hlim taka damlo an biak hian damlote nasa takin a thlamuan thin, Health Minister chuan a ti a. Chutiang mi tha tam tak karah tlemte inthlahdah an lo awm thin erawh pawi a tih thu sawiin nurse an zir tirha thutiam ropui tak an neihte vawng tlatin, missionary thinlung pua thawk turin Nurse te a fuih a ni. Pu Lal Thanzara chuan sawrkarin Nurse-te indaihlohna nasa tak tihziaawmna tura Nurse thar lak a tumna vanduaithlak taka tlawlh ta pawh chinfel thuai anih theih nan hmalak mek a nih thu leh Nursing Directorate hran dinna tura hmalakna a kal mek thu a sawi bawk.
TNAI Mizoram Branch Conference-ah hian an President Pi Lalfamkimi’n thusawiin an pawl hmalakna tlangpui a tarlang a. Tun dinhmunah member 1876 neiin kum 1964 November thlaa din he pawl hian Golden Jubilee pawh kum 2014 khan an lo lawm tawh a ni. TNAI Mizoram Branch hi India ram State hrang hrang zinga By Law nei thei Branch pali zinga pakhat niin a dangte chu Tamil Nadu, Gujarat leh Kerala te an ni a. TNAI pisa pui ber pawhin kawng hrang hranga an hnathawh that te hriatpui nan Kochi Kerala-a TNAI Biennial Conference 2010 ah khan chawimawina an hlan a ni.
Ni hnih awh tur TNAI Mizoram Branch 18th Biennial Conference-ah hian an thupui chu Nurses: A Voice to Lead - Achieving Sustainable Development Goals tih a ni a, he thupui hi India ram pumah hman a ni. Thupui sawihawnna hi Economic Welfare Committee Chairperson Pi Lalchhanhimi’n a nei a. An pawl Vice President Pi Lalremmawii’n lawmthu sawiin Conference hawnna inkhawm hi a khar a ni.
