Vawiin khan Health Minister Lal Thanzara chuan Industrial Growth Centre, Luangmual ah Bricks, interlocking pavers leh Chequered tiles siamna hmun, F. Hrangvela Enterprise a hawng. 

Pu Lal Thanzara chuan insakna leh kawngsiamna atana tangkai em em, cheng tam tak senga state pawna tanga  lakluhthin, brick, kawngchhuatphah leh chequered tile Mizoramah siam a lo ni ta chu lawmawm a tih thu sawiin Industries huangah Mizoram mellungthar phunna ni a ni a ti a. State pawna tih theih ang state chhunga tih theih chu hnam humhalhna leh pawnlam sumdawngte laka invenna pawimawh tak a ni a ti.  

Mizoram in hma a sawn zel thu tarlangin tunhmaa bank Mizo mipuite hmelhriatloh tamtak hmuhtur a lo awm ta chu hmasawnna tarlangtu a ni a ti a. Industries emaw sumdawnna dinduh tan pawh bank nena thawhhona kawngzawn a remhriat thlak bera a rin thu a sawi a. Mizorama mihausa dang te pawh in mirethei zawk te eizawnna siam tumin hnathawhtur siama industries leh sumdawnnaah huang an zauh a ngai a ni a ti a. Mizoramin hma a lo sawn zawk nan leh hnathawhtur neihloh avanga harsatna te sutkian a nihtheih nan  mitam zawkin midangte eizawnna siamsak zawnga hma an lak a ngai tawh  tih a tarlang. 

Vawiina hawn tak, F. Hrangvela Enterprise ah hian thawktu 70 awmin brick, chequered tile leh interlocking pavers siamna khawl pahnih a awm a. Helai hmuna an thilsiam te hi Silchar ami nen inangkhatin tarlan a ni a. He factory dinna atan hian SBI Bawngkawn atangin F.Hrangvela Group of Industries chuan tanpuina a dawng a  ni. 

 F. Hrangvela Enterprise hawnna inkhawm hi Pu K.Lalhmingthanga, President, MCI in a kaihruai a. Pu K.Lalsawmvela, CE, PWD leh Factory neitu lam pawn thusawina hun an hmang.