Vawiin chawhma khan Tourist Lodge, Chaltlang-ah Health Minister Pu Lal Thanzara chuan damdawi lam thiamna zirmite inkhawmpui leh Rampum huap Damdawi Hapta "Mizoram Pharmacists' General Conference 2016 cum National Pharmacy Week " Mizoram Pharmacists' Association(MPA) in a buatsaih chu a hmanpui.
Health Minister Pu Lal Thanzara chuan,"Khawvel hmasawn zelah mipui hriselna atan Pharmacist te mawhphurhna pawh a sang tial tial a, mipui hriselna atana in mawhphurhna in hriat thar leh ka duh tak zet a". "Damdawi chi tam tak Damdawi dawr ah lei theih in a awm ta a, hengte hi a nihna dik tak hrechiang a, pe chhuak theitu awm chhun chu Pharmacist-te chauh hi in ni a. Mizoram in Damdawi siam chhuahna kan la neih loh avangin, Damdawi siamchhuah sa kan zawrh te hi a him leh him loh te, dik taka zawrh leh lei a ni em tih te hi, Pharmacist te hian kan ngaihven reng tur a ni" a ti. Pharmacists' hnaruak tamtak a awm tih a hriat thu Minister chuan sawiin sum harsatna karah pawh mipui in an mamawhna avangin pharmacist hna engemaw zah tal chu lak a nih theih nan hmalak mek a ni a ti a. Pharmacist te chuan an thiamna te chu damdawiin-ah te, mipui zirtir na atan leh ramhmul damdawi siamchhuahna atan thleng te paw'n Mizoram tan tangkai taka hmang turin a chah a. Pu Lal Thanzara chuan Damdawi thianghlim leh him mipui tana lei tur a awm theih nan damdawi diklo te manchhuah kawngah Pharmacist te chu sawrkar tan thahnem ngai zel tur leh Medical Reimbursement dik lo chhuichhuahna kawngah pawh inthlahdah mai lova sawrkar venpui zel turin a sawm a. Hna pawimawh tak thawk an nih anga an hnathawh te pawh tunlai thiamna computer leh internet te hmang tangkaia tat hriam reng tura chah in Doctor leh Nurse te tan pawh rawn theih nih tum zel turin a fuih.
MPA Conference-2016 hi hun 2-ah then a ni a. Hun hmasa lamah hian MPA Annual Magazine' The Mizoram Pharmacists' Annual Magazine 2016' leh Mizoram State Pharmacists' Council Official Website chu Health Minister Pu Lal Thanzara'n a tlangzarh a; MPA hmalakna report ngaihthlakna hun te, an member chatuan ram pan ta te sunna hun te hman a ni. Pharmacists' te hnathawh puihtu atana buatsaih 'Pharmacists' Manual on Drug Storage(A-C) pawh Pu Lalsawma Pachuau, Jt.Director, Food & Drugs, DHFW in a tlangzarh nghal a ni a. Hun then 2-na ah Zunthlum enkawlna leh pumpelhna chungchanga Pharmacist te mawhphurhna te inzirtir neih ni in MPA hruaitu thar tur thlanna neih a ni. MPA Report in a tarlan dan chuan Mizoram ah Registered Pharmacists 323 an awm a. Indaih lohna avanga Pharmacy zirlo damdawi zuar tam tak an awm tih sawiin pharmacy zirchhuak te chauhin damdawi an zawrh theih nan MPA chuan hmalak a tum tih tarlan a ni a. RIPANS atanga B.Pharm Graduate zinga tithaber Lalrengpuii leh Laithangpuii College of Pharmacy atanga Diploma in Pharmacy titha ber C.Lalnunpuia te hnenah S.L Sailo Pharmacy Award hlan an ni.
