Nimin khan Health Minister Pu Lal Thanzara chuan State Referral Hospital, Falkawn a tlawh a. Parliamentary Secretary Pu K.S. Thanga, Aizawl South III bialtu MLA ni bawk bakah Health Secretary Pu Lalhmingthanga, Health Department Principal Secretary Dr.K.Ropari, Health Services Director Dr.Rohmingthanga Ralte, Hospital & Medical Education Director Dr. Lalbiakkima leh mipawimawh dangte’n an tawiawm.

State Referral Hospital tlawhtu Minister leh mi pawimawh te hi Dr.Jane R. Ralte, State Referral Hospital a Deputy Medical Superintendant leh officer dangte’n an lo dawngsawng a. Minister hian Referral Hospital hmun hma hi chipchiar taka fangin thawm that a ngaihna lai te, staff dah belh ngai leh khum mamawh belh a nih dan te a hmunah a en a. He hospital hi Medical College tura ruahman a nih angin Medical Council of India in tihtura a tuk (norms) an phak lohna lai te enin hmalak chhunzawm dan tur an thlirho a ni.

Tun dinhmunah State Referral Hospital hian khum 150 a nei mek a, doctor zirlai 100 neih theihna tur chuan khum 150 dang dah belh a ngai dawn a. Heta tan hian building zauh te, pindan chei that te, hmanrua lakkhawmte leh thawktu pawh engemawzat lak belh a ngai dawn a ni. Medical Council of India duhdan anga he Hospital chei that a nih theih nan sawrkar laipui atangin sum Rs 170.1 crores hmuh beisei a ni a, Mizoram sawrkar in a do letna (matching share) Rs 18.9 crores a pe chhuak ang. A thawhkhatna central atangin Rs 50 crores hmuh thuai theih beisei a ni a. Karleh a neih tur New Delhi a Technical Evaluation Committee (TEC) meeting-ah Mizoram sawrkar aiawhin Health Secretary in hemi chungchang hi a thlen dawn a ni.

State Referral Hospital hi changtlung taka kalpui niin doctor te’n hneh takin an vil reng a, damlo pantu an thahnem hle. H1N1 vei an awm palh pawha enkawl theihna tur ICU pawh peihfel thawkhat a ni tawh a, hetiang natna vei an awm a nih chuan hman theih reng a ni tawh a ni. Health Minister hian naupang ward (Paediatrics) atan khum 18 chu naktuk atanga hman tan nghal turin ruahmanna a siamsak nghal bawk.

Nimin kha Mizoram Mistiri Association din champhaphak a nih avangin hemi ni lawmna atan Chhimphei Mistiri Association chuan a thlawnin Referral Hospital tan hian in te pakhat leh chhuar engemawzat an siam sak a ni.