No.3559/2021-2022

Aizawl, 5^th January, 2022 : Vawiin khan Health Minister Dr. R. Lalthangliana chuan Central YMA Office Bearers-te a pisaah kawmin COVID-19 hripui chungchang an thlirho bakah leh hmalak zel dan turte an sawiho a,  Health & Family Welfare Board Vice Chairman Dr. ZR Thiamsanga, MLA pawh he meeting ah hian a tel a ni.

Vawiina Health Minister leh Central YMA OB-te inkawmnaah hian COVID hripui dona kawnga sawrkar, YMA leh tlawmngai pawl dangte thawhho zel dan tur te, COVID variant thar ‘Omicron’ lo thleng thut thei chungchanga lo inruahman dan turte sawiho a ni a. Meetingah hian VLTF/LLTF tihnun thar leh a tul thute, media hmanga COVID awareness uar zawka kalpui a tul thute, COVID hri kai dam lo enkawl dan chungchangte sawi lan a ni a. COVID hripui thawh thumna lo thleng thei atana fimkhur a tul thu leh tha thlah lova tan tlat a pawimawh zia te sawiho a ni. YMA hruaitute chuan sawrkarin YMA General Conference hman phalsak mai ni lovin ruahmanna him leh felfai tha tak a siamsak avangin lawmthu an sawi bawk a ni.

Central YMA Office Bearers-te nen an inkawm hnu hian Health Minister Dr R. Lalthangliana chuan Aizawl City Local Council Association Office Bearers-te kawm lehin COVID-19 hripui laka kan dinhmun an thlirho bakah hmalakna tur pawimawh tulte an sawiho a ni.