Vawiin khan Health Minister Pu Lal Thanzara leh Ministry of AYUSH hnuaia Central Council for Research in Homeopathy Director General Dr. Raj K. Manchanda chu Health Minister pisa ah inkawmin, Mizorama AYUSH tihchangtlunna leh AYUSH hmalakna tihphuisui theih dan tur kawngte an sawi dun a ni.

Health Minister chuan Health & Family Welfare Department-in AYUSH a kalpui dante hrilhin, AYUSH than zelna atan leh mipui mimir in AYUSH damdawi an hmelhriat zel thei nan Central Council for Research in Homeopathy in mawhphurna lian tak a neih thu leh, Mizorama AYUSH hmalakna leh hnathawh tih chak nan mithiamte chherchhuah kawngah leh infrastructure dinna kawnga theihtawp chhuahpui turin a sawm a. Mipui in AYUSH enkawlna an ngaihsak zual zawk theihnan Council hmalakna leh ruahmanna chuan a tha lamin thui tak nghawng a neih theih thu Minister hian Dr.Manchanda chu a hrilh a ni.

Dr. Manchanda chuan Aizawl Civil Hospital-a AYUSH zir bing na Clinical Research Unit chu Regional Research Institute a hlankai a nih thei nan Council-in hma lak a tum thu sawiin, he Unit kaltlang hian AYUSH doctor-te tan Continuing Medical Education (CME) programme pawh tan vat a nih tur thu a hrilh a. He Clinical Unit pawimawh nate sawiin thisen sang in tan tur te, zunthlum in tan tirh dan zirbingna te kalpui chhoh tum a nih bawk thu a sawia.

Ramhmul damdawi (medicinal plants) chungchanga Minister zawhna changin Dr. Manchanda chuan ramhmul damdawi chin (cultivate) chu eizawnna tling tha tak mai a nih thu te, state danga tlangram hmunah pawh hlawhtling taka kalpui mek a nih thu sawiin, Mizorama ramhmul damdawi chin chu Medicinal Plants Board hnuaia chak taka kalpui a tul tih a sawi a. Ramhnuai atanga ramhmul damdawi lak chu tuna Forest dan hman mekin a khap avangin hemi chungchangah hian dan ennawn erawh a tul tur thu Minister hi a hrilh a ni.