No.1048/2020-2021

Health & Family Welfare Minister Dr. R. Lalthangliana leh Home Minister, Disaster Management & Rehabilitation Minister ni bawk Pu Lalchamliana ten vawiin khan Aizawl khawpui chhunga Quarantine Facility pali – Youth Hostel, Luangmual, Tourist Lodge, Chaltlang, NIELIT, Zuangtui leh R. Dengthuama Hall, Mualpui te an tlawh a, Quarantine Facility viltute nen in kawmin an dinhmun leh hmalak dan te an enfiah.

Quarantine Facility hrang hrang an tlawhna ah hian Health Minister Dr. R. Lalthangliana chuan Mizoram mi leh sa state pawna tangkhang rawn haw tur hi a tira hisap aiin an tam tak avangin Quarantine Facility ruahman pawh a hautak hle a ni, a ti a. Tunah hian Mizoramah positive case kan nei rihlo a a lan avang hian kan thla a muang sual ang tih a hlauhawm a, hotspot kan tih mai, COVID-19 vei tamna hmun atanga Mizorama rawn haw tur an tam a, kan fimkhur hle a tul a ni a ti a, kan fimkhur loh chuan sawrkar leh NGO-te, Local/Village Level Task Force bakah mipuiten hah tak leh rim taka hun engemaw chen kan lo beih ve tang tangna hi zan khat thil thu ah kan tichhe vek thei tih hria a sawrkarin tih tur leh tih loh tur a tih te tha taka zawm tlat turin mipuite a chah a ni.

Health Minister chuan Mizorama rawn haw turte hi a tahtawlin hruai haw an ngai dawn a, kan insengluh kim a quarantine an zawh fel vek hnu ah kan dinhmun dik tak a hriatchian theih dawn a, hemi chhung hian mipuite kan fimkhur lehzual a ngai rih dawn a ni tih sawiin dawhthei tak leh thuawih taka lo tang hram hram turin mipuite a ngen a ni.

Disaster Management & Rehabilitation Minister Pu Lalchamliana pawhin tangkhang Mizorama rawn haw tur mi singkhat dawn an awm thu sawiin Quarantine Facility ngaihtuah a hautak a ni a ti a, tunah hian kohhran hrang hrangte nen indawr mek a nih thu leh Quarantine Facility atan kohhran hall hman an remtih chuan phur nasa takin a chhawk zangkhai in a rinawm, a ti. Tangkhang lo haw turte enkawlna atan sawrkarin sum a sen belh hnem dawn tih sawiin Rapid Antibody Test kit hi pakhat Rs. 700/- man a ni a, mipakhat tan vawihnih test zel a ngai dawn a, quarantine a an awm ni 14 chhung hian mipakhat tan nitin ei leh in manah Rs. 300/- sen a ni bawk a, hei bakah hian an mutbu leh mamawh thenkhat towel, toothbrush, toothpaste etc., pek an ni bawk a, mi singkhat bawr vel lo haw tur tan hian sum leh pai tam tak sen a la ngai dawn a ni, tiin mi tlawmngai leh mi thilphalte zarah engemawchen harsatna tawk lovin kan la awm thei a ni, a ti bawk.

Youth Hostel, Luangmual hi mi 78 awm theihna atana ruahman niin tunah hian mi 69 quarantine mek an ni a, mipa 37 leh hmeichhia 32 awmin Assam, Manipur, Meghalaya leh Tripura atanga rawn haw te an ni a, an ei leh in tur hi Chhangte Catering in an siam sak a, May ni 15, 16 leh 17 a quarantine period hmang zo tur te an ni.

Tourist Lodge, Chaltlangah hian quarantine nana hman room 25 awmin mi 64 awm theihna tura ruahman a ni a, tunah hian mi 48 (mipa 24, hmeichhia 28) quarantine an ni a, an vai hian Assam atanga lo haw an ni. An ei tur hi Tourist Lodge enkawltu ten an siam sak nghal a, May ni 15 hian quarantine hun hmang zovin a tuk may ni 16 ah an chhuak ang

NIELIT, Zuangtuiah hian quarantine lai mi 111 an awm a, mipa 48 leh hmeichhia 63 niin Assam atanga lo haw mi 21, Manipur atanga lo haw mi 69 leh Meghalaya atanga lo haw mi 21 an ni a, ei leh in hi Dawng Dawng catering-in an buatsaih sak a, May ni 16 ah quarantine hun hmang zo hmasate an chhuak ang a , May ni 20 ah an chhuak zo ang.

R. Dengthuama Hall-ah hian mi 145 awm mekin mipa 84 leh hmeichhia 61 an awm a, Assam atanga lo haw mi 71, Meghalaya atanga lo haw mi 68, Maharashtra atanga lo haw mi 3 bakah Sethawn, Kolasib District atanga Aizawl rawn haw mi 3 an ni. ei leh in hi Dawng Dawng catering-in an buatsaih sak a, May ni 15 ah mi 21 in quarantine hun an hmang zo ang a, May ni 16  ah mi 83, May ni 17 ah mi 30 in an hmang zo ang a, anni bak hi chu tunhnaia lut thar an nih avangin ni 14 quarantine an hman zawh hnu ah an chhuak chauh ang.

R. Dengthuama Hall hi a chung a far nasat avangin quarantine a awm ten harsatna an tawk tih a viltuten an sawi a, DM&R Minister chuan a chung tih phui nan a rang lama silpauline a khuh turin thuneitute a hrilh nghal a ni.

Heng quarantine facility ah te hian zing dar 8, chhun dar 12 leh tlai dar 6 ah eitur pek niin ei leh in tur an dawn chungchangah sawisel an awm thawm an hriatloh thu a enkawltute hian an sawi a ni.

Quarantine facility te hi Medical Team ruat bik ten an vil reng a, nitin thermal screening tih sakin damdawi mamawh te a theih ang angin a thlawna pek an ni a, thenkhat chu an chhung ten security duty kaltlangin an pe thin bawk a ni. Quarantine facility a awm te an chhuah hnu hian an mutbu te tihthianghlim (sanitise) nghal zel a ni a, Aizawl Municipal Corporation lamin  ni khat kar danah an hnawmhnawkte an thenfai sak thin a, rapid antibody test tihsak vek niin a tul angin psychological counselling neih pui thin an ni bawk.

Heng bakah hian police duty dah an ni a, DM&R atangin Quick response Team in an vil reng bawk a ni.

Aizawl District ah hian Quarantine Facility 20 ruahman niin mi 1114 leng tura ruahman a ni a, tunah hian mi 672 quarantine mek an ni.