842/2026-2027

Lunglei, 2026 Nikir thla ni 4: Vawiin khan HPC Conference Hall, Lungleiah Lunglei Beautification Committee an ṭhu khawm a. Lunglei High Powered Committee (HPC) Vice Chairman leh Lunglei Beautification Committee Chairman Pu V. Malsawmtluanga'n ṭhut khawm hi kaihruaiin, Health & Family Welfare Minister Pi Lalrinpuii'n a uap bakah, LMC Vice Chairman Pu K. Lalrinawma leh Councillor-te leh sawm bik te an tel.

He ṭhut khawmah hian Lunglei khawpui luhka hmun hnih – Pukpui khaw dai leh Zobawk khaw daiah te "Welcome Gate" siam ni se, tih a ni a. He Gate siam nan hian Lunglei khawpui chhunga MLA leh Councillor tinin sum an thawh khawm bakah, HPC Fund aṭang pawhin a ṭul anga thawh belh an inhuam thu Chairman Pu V. Malsawmtluanga chuan a sawi.

Lunglei khawpui danglam bik, "Unique Lunglei" kalpui chungchang sawi ho niin, in chung rawng inang hman theih dan ngaihtuah ni se, zau zawka NGO leh pawl hrang hrangte nen inrawn khawm ni se, tih a ni.

Lunglei khawpui laili lai, vantlang hmun leh kalkawng leh khawpui hmelhmang felfai leh mawi zawka thlak danglam dan tur sawi ho a ni a. MLA-te leh LMC Councillor-te chuan khawpui chei ṭhat nana sawrkarin cheng vaibelchhe 12.62 a ngaihtuahsak chu lawmawm an tih thu sawiin, hei hian nasa takin khawpui a cheimawi dawn tih an sawi.

Khawpui chhunga ramngaw siam (urban forestry) chungchang sawi ho ni bawkin, LMC subject a nih anga LMC-in hma a lak bakah, GMM leh NGO te'n thing phun lama an hma lakna chu theih tawpa thawhpui ni se, tih a ni a. MLA leh LMC Councillor-te pawhin mahni bial chhung ṭheuhvah hmun remchang lai a awm chuan hma lak ni se, tih a ni.