2741/2025-2026

Lunglei, 2025 Pawltlak thla ni 19: Mizoram chhim lam district pali - Lunglei, Siaha, Lawngtlai leh Hnahthial District te'n hri danna (vaccine) an pek tur rang leh awlsam zawka an hmuh theih nana Lunglei District Senior Chief Medical Officer (SCMO) office-a vaccine dah khawlna tur, Regional Vaccine Store (RVS) ruahman thar chu vawiin khan Mizoram sawrkara Health & Family Welfare Minister Pi Lalrinpuii'n a hawng.

Regional Vaccine Store hawn puala District TB Centre Conference Hall-a inkhawm buatsaihah Health Minister Pi Lalrinpuii chuan Lungleia Regional Vaccine Centre hawn chu bung thar kaina a nih thu sawiin, Lunglei chhehvel district hrang hrang Lawngtlai, Siaha leh Hnahthial District te'n hmun hnai zawk Lunglei aṭanga vaccine sem tur an la thei tawh tur chu lawmawm a tih thu a sawi a. Mizoram sawrkarin hmasawnna rualkhai zawk a awm theih nan thu neihna sem zai (decentralisation) kalpui a, hmun hrang hranga sawrkar hma lakna khairual taka kalpui a tumna rah chhuah chu State University hmun tur chungchangah lang tawhin, tunah Regional Vaccine Store chungchangah a lo lang chhuak leh ta a ni, a ti a. District hla zawkte'n Aizawl aṭang veka vaccine sem tur an lak chuan vaccine la tura senso a tihsan bakah, vaccine reng reng cold chain (hmun vawt tak, +2 to +8 degree celsius inkar)-a awm reng tur a nih avangin a lakna a hlat lutuk chuan cold chain-in a nih tur ang ni lovin, a chhiat hma phah ṭhin tih sawiin, Lungleia vaccine dah ṭhatna tur RVS hawn chuan chu harsatna chu a pumpelhtir tur thu a sawi.

Health Minister chuan Health Department-in damlo enkawl bakah invenna lam nasa takin a kalpui reng tih sawiin, National Health Mission hma lakna zawng zawng leh Directorate of Health Services hma lakna pui ber chu natna laka inven leh hriselna kawng inzirtir (Prevention and Health Promotion) a nih thu a sawi a. Universal Immunisation Programme hnuaiah vaccine-in a ven theih natna venna vaccine 11 - Diphtheria, Pertusis, Tetanus, Polio, Measles, Rubella, TB, Hepatitis B, Hemophilus Influenza Type B, Roravirus leh Pneumococcal Pneumonia Vaccine pek a nih thu sawiin, puitling kawṭhalo vaccine pe turin Doctors Without Border te nen hma lak ho tum a nih thu a sawi a. Chuti ang vaccine pek tur Lungleia dah khawl theih a ni ve tawh tur chu hmasawnna leh ruahmanna lawmawm tak a nih thu a sawi.

Health Minister chuan damdawi in ṭha tehnaa hma sawn turin damdawi in lian ber aṭanga sub-centre thlengin a tihfai leh tihthianghlim kawngah nasa taka hma lak a nih thu sawiin, chu'ng hma lakna chu damlo enkawlna kawnga inthlahdah phah nana hman tur a nih loh thu leh inbuk tawk taka kalpui thiam a ṭul thu a sawi a. Invenna lam kawngah sub-centre-te thuam changtlun chhoh zel an nih thu sawiin, natna inkai chhawn theih loh (Non-Communicable Disease) langsar - zunthlum leh thisensang te an test theih reng thu leh damdawi pawh a thlawna lak mai tur an kawl thu a sawi a. Nat viau tawh hnua damdawi in pan chauh lovin, khaw tin leh veng tina sub-centre-te hmang ṭangkai a, a thlawna damdawi lak tur awmte chhawr ṭangkai turin mipuite a chah.

Health Minister Pi Lalrinpuii chuan sawrkar damdawi in thuam ṭhat zel a nih thu leh inenkawlna (healthcare) pawh tihchangtlun zel a nih thu sawiin, Civil Hospital Lunglei thuam ṭhat nan mipui chhiah tling khawm, CESS aṭangin Civil Hospital-a lift chhe reng tawh siam ṭhat a nih tur thu te, lung natna enkawlna khawl 2D echo machine leh holter machine te lei a nih tur thu leh Opthalmology Department lamah mit enna, Retina Scanner khawl manto tak lei tum a nih thu a sawi a. Mizorama lung zaina (open heart surgery) nei turin ZMC&H-ah CSR kal tlanga hma lak mek a nih thu leh kum tharah tlawm zawka Mizoram ngeia lung zai thei tawh tura tihpuitlin hman beisei a nih thu te, rei lo teah thluak zai thei tura hma lak chhoh mek a nih thu te, nau pai thei lote tan ZMC&H-ah IVF Centre din tura hma lak mek a nih thu leh Mizorama kal thlak (kidney transplant) ti thei turin UD&PA hnuaia Smart City te nen ṭang tlanga ngawrh taka hma lak mek a nih thu te a tar lang bawk.

Health Minister chuan Mizoram Universal Health Care Scheme (MUHCS) chu a chhawr tawhte'n an fak thu leh inziak lut duh pawh an pun zel thu sawiin, MUHCS hnuaiah damlo enkawlna bill ba a awm ngai loh thu leh kar tin bill an pek zawh nghal zel ṭhin thu a sawi a. Khua leh tui zawng zawngin inenkawlna ṭha an hmuh theih nan leh a zawmtu damdawi inte tan pawh zawm manhla tak a nih theih nan MUHCS tihchangtlunna kawngah theih tawpa hma lak chhunzawm zel a nih thu sawiin, kum 2026 April thlaaah inziah luh tharna hun hawn leh a nih tur thu a sawi.

Lunglei SCMO Dr Lalrinthangi chuan hun kaihruaiin, inlawmna thu a sawi a. H&FW Joint Director (EPI), State Immunisation Officer Dr Zoramruati Ralte chuan Regional Vaccine Store Lunglei din turin June ni 25, 2024-ah Ministry of Health & Family Welfare aṭangin phalna hmuh a nih thu sawiin, a hlawhtlinna tura thawktute hma laknaah lawm thu a sawi a. Aizawlah India rama vaccine store ṭha ber pawl, Solar State Vaccine Store a awm tih tar langin, Lungleia Vaccine Store pawh chu lian leh changtlung zawka thuam chhoh a nih theih nan thawktute chu hma la zel turin a chah a. RVS Lunglei chu vaccine pek chhuah kawnga chhim lam bial chawm zo tur leh awlsamna thlentu a ni dawn tih sawiin, sawrkar, kohhran leh mimal enkawl damdawi inte pawhin ṭangkai taka an hman theih tur thu a sawi a. Sawrkarin vaccine chi 11 a pek chhuah chu private hospital-ah pawh a thlawna pek chhuah ṭhin a nih thu sawiin, private damdawi inte'n sawrkar vaccine an hmang a nih erawh chuan sawrkar rate an zawm a ngaih thu leh vaccine pek manah ₹150 bak an lak a rem loh thu a sawi.

He hunah hian Lunglei Municipal Council (LMC) Vice Chairman Pu K. Lalrinawma bakah, H&FW leh I&PR official te, MJA member-te leh H&FW hnuaia thawktute an tel a. Lunglei District TB Officer Dr K. Lalhmachhuana'n lawm thu sawiin hun a khar.