739/2026-2027

Aizawl, the 28th May, 2026: Vawiin khan Health Minister Pi Lalrinpuiii chuan Mizoram Government Nursing Service Association (MGNSA) Conference vawi-23na chu Aizawl Civil Hospital Conference Hall-ah a hmanpui. Kumin MGNSA Conference thupui atan Soft Skill for Nurses tih chu hman a ni.

Pi Lalrinpuii chuan Nurse hna hi hna naran a ni lova; mi bik, inpekna nasa tak nei ten taimakna, dawhtheihna leh inpumpekna nasa tak nena thawh ngai a ni, a ti. Mizoram sorkar chuan Nurse te pawimawhzia hriain, an indaihlohnate phuhru turin kum 2025 April thlaa Mizoram Universal Health Care Scheme tlangzarh a nih dawn khan Nurse 300 chuang lak an ni a, hei bakah hian a nghetin Nursing Officer sawm (10) lak an ni tih a sawi a. Health & Family Welfare hnuaiah contract-in Nurse 40 lak an ni leh dawn a, Senior Nursing Officer sawm (10) pawh lak thuai a ni dawn, Minister chuan a ti. Nursing School lamah Tutor post 9, leh Warden post 1 atan MPSC written exam result nghah mek a ni a.  Hei bakah hian Nursing College lam atan Assistant Professor post 5 advertisement nghah mek a ni bawk tih sawiin Pi Lalrinpuii chuan vawi leh khatah an indaihlohnate phuhru thei lo mahse, hmasawn zel turin Mizoram Sawrkar chuan hmalak chhunzawm zel a tum a ni, a ti.

Aizawl Civil Hospital tichangtlung tura sawrkar hmalakna hrang hrang sawiin Cath lab dah thar a ni a, MRI khawl bakah bungraw chi hrang hrang dah a ni a, mipui chhiah tlingkhawm – CESS atangin Artroscope khawl thar cheng nuai 120 lei a ni a, kal thlak (kidney transplant) pawh tih tan thuai tum niin inzaina bungrua lei chhoh mek a ni a, thawktute pawh a bika training turin Kolkata tirh an ni tawh, a ti a. Current awm loh zauh zauh changa Civil Hospital te an buai lohna turin VIP line zamna tur pawisa leh Oxygen Pump khawl thra man tur pawh sawrkarin a pe fel tawh tih a sawi bawk.

Pi Lalrinpuii chuan ZMCH lamah pawh Cardio-thorasic surgery ti turin an inbuatsaih fel tawh a, thawktute training neiin PGI Chandigarh lamah an kal tawh bawk a; CT Scan thar hawn fel niin, Siaha leh Champhai ah CT Scan dah thar a ni bawk a; Oxygen Plant thar neihna tur sum Sawrkarin a pe tawh a; Mamit District Hospital building thar pawh luahluh mai tura peihfel tawh niin, Serchhip, Kolasib leh Hnahthial District Hospital pawh sak mek a ni, a ti.

Conference hmang tur hian Directorate of Nursing hotute leh Mizoram hmun hrang hrang atangin MGNSA member te an kal khawm a. National Florence Nightingale Award dawng mi pahnih (2) Pi V.Lalhmangaihi, Nursing Officer leh Pi H.Mankimi, Senior Nursing Officer te bakah hruaitu chawimawina Pu Lalhmingmawia Thangluah, Nursing Officer hnenah hlan a ni.

MGNSA President chuan Pu H.S. Lalremtluanga, thuchah a sawi a. Kum 2024 – 2026 MGNSA Conference inkara an member boral pakhat (1) sunna hun an hmang a. Pension sawmnga pakhat (51) an thlah a. An Vice President Pu Zoramchhana’n lawmthu sawiin hun a khar a ni.