891/2026-2027 

Dated, Aizawl 8th June, 2026: Vawiin khan Population Based Cancer Registry Mizoram buatsaihin Workshop cum Re-Orientation on Cancer Registration and Data Quality chu McCabe Hall, Aijal Club ah hman a ni a, Health and Family Welfare Minister Pi Lalrinpuii chuan khuallian niin hun a hmanpui a, Mizoram Population Based Cancer Registry Report (2018-2022) a tlangzarh nghal.

Minister chuan PBCR Mizoram te hmalakna chu ropui a tih thu a sawi a. PBCR report hian Mizoram pum huap cancer a kan dinhmun chiang taka a pholan thu sawiin, Report-in a hmuhchhuah angin Mizoramah kum tinin cancer case kan neih belh zel a, chutih rualin curative treatment leh palliative care lamah pawh hma kan sawn chho zel chu lawmawm a tih thu a sawi a ni. JICA (Japan) te nen tangkawp a tuna Mizoramin Cancer Hospital changtlung zawk a neih theihna tura hmalaknaah pawh PBCR statistics hian thui takin kawngro a sut thu sawi a. Health Minister chuan Mizoram PBCR data chu IARC-WHO in a pawm thlap tiin, "Cancer in 5 Continents (C1-5)" an tìhah a zawna vawi 3- Volume IX, X leh XII-ah te lang thei a nihna chuan a rintlak zia a nemnghet a ni, a ti.

Khual zahawm Pi K.Lalrinzuali, Commissioner & Secretary, Health & Family Welfare Department pawhin thu sawiin, Mizorama Doctor thiam tak tak te inpekna leh thawrimna chu ropui a ti a. Doctor te chu an hlutna hre thar tur leh, damlo mangang tak tak te dawhthei taka an enkawl thin avangin an chungah lawmthu a sawi bawk a ni. Hriselna kawnga state in hma a sawnna turin, duh leh mamawh an neih ang te chu thlen thin turin kalkhawmte a chah bawk a ni. 

Dr. C. Lalchhandama, Principal Investigator PBCR Mizoram chuan kalkhawmte zingah Trending Cancer Scenarios in Mizoram tih thupui hmangin kum 20 chhunga zirchianna an lo neih tawh atanga an thil hmuhchhuah te a sawi a. PCBR in a tarlan danin Mizoram chu India ram pum puiah cancer a  sang ber kan ni tih a sawi. Kum 2003 – 2020 thlenga zirchiannaah cancer-a san lam kan pan char char thu sawiin, Mizo mipa te ah Pumpui Cancer an tam ber thu leh, hmeichhia ah Chuap Cancer an tam ber thu a sawi a. Mizoram in Cancer kan beihletna atana kan mamawh te, hmalak na tur leh hmalak theih dan hrang hrang te a tarlang nghal bawk a ni.

Mizorama cancer dinhmun dik tak hriatchian a nih theihna tura hmalakna leh PBCR Mizorama sulsutu a nih avangin Dr. Eric Zomawia hnenah PBCR Staff te chuan chawimawina an hlan nghal bawk a ni. 

Programme hi hun hnihah then niin, hun khatna hi Dr. Lalchhuankimi, Senior Medical Superintendent, Civil Hospital chuan lawmthu sawi na in a khar a, hun hnihnaah  hian Dr Jeremy L Pautu, Co-Investigator, Mizoram PBCR kaihhruaina hnuaiah mithiam sawm bik te nen PBCR chungchang sawihona hun an hmang bawk a ni.