557/2025-2026

Aizawl the 24th May, 2025: Vawiin khan Ramhlun North Health Centre Building thar chu Pi Lalrinpuii Health Minister-in a hawng a, Minister hi Bialtu MLA Dr. Vanlalthlana, Education, etc Minister, Dr. Lalhlunpuii, CMO Aizawl East, Dr Walter Lalnuntluanga Sailo, Dy. CMO Aizawl East, Dr. Lalnunpuii leh Urban Health & Wellness Centre, Ramhlun North Staff-ten an tawiawm a ni.

Health Minister Pi Lalrinpuii chuan hetianga Ramhlun North Mipuite tana health clinic ṭha tak mai nei thei hi lawmawm a tih thu leh thawktu tur pawh sawrkarin a ngaihtuah ang a, mipui tam zawk tana tangkai taka hman a nih ngei a beisei thu a sawi. He centre bungraw mamawh tih changtlunna tur hian khawtlang hruaitu leh bialtu MLA te pawh thawhpuiah a sawm nghal bawk. Mipui Health care registration hi sub centre ah tih tur a nih avangin theihtawpa mipuiah awareness neihpui turin a sawm a, June thla thleng chauh registration hun hawn a nih dawn avangin theihtawp chhuahpui turin a sawm nghal bawk a ni.

Bialtu MLA leh Minister ni bawk Dr. Vanlalthlana pawhin thusawiin hetianga Ramhlun North mipui tana Health centre building ṭha tak a awm ta hi lawmawm a ti a, a chhunga hmanrua tur pawh theih ang anga ngaihtuah a, hb test-na pawh a pek nghal tur thu a sawi.

He hunah hian Ward Councillor Pi C. Lalchhandami pawh tel vein Aizawl khawpuiah Ramhlun North hi Veng lian leh mipui tamna ber pawl a nih thu a sawi a. Tunhmain ṭhahnemngai taka an lo sualchhuah Urban Primary Health Centre (UPHC ) chu Veng dangah sawnsak an lo nih tak avangin rualawt taka an awm laiin Health Centre ṭha tak an neih leh theih nana Health Minister-in a bulṭan nan a building sakna tur a pe chu lawmawm hle a ni a ti. UPHC puitling pawh an neih leh ngei a beisei thu a sawi bawk a, Health Centre building sakna ram neitu LC chungah pawh lawmthu a sawi a ni.

Health Centre sak nan hian Sawrkar atanga hmuh Rs 2,90,000/- bakah Pi C. Lalchhandami, Corporator chuan Property Tax Return atangin cheng nuai 4 lai thawh belhin building ṭha leh changtlung tak hi sak a ni.

Health Centre building, Ramhlun North hawnna hun hman zawh veleh Health Minister Pi Lalrinpuii chuan Urban Health & Wellness Centre, Ramhlun North a tlawh nghal bawk a ni.