792/2024-2025

LUNGLEI; the 13th, June, 2024: Nimin khan Chanmari Hall, Lungleiah YMA Chanmari Branch Golden Jubilee (1974-2024) lawmna hun hman a ni. Pi Lalrinpuii, Minister, Health & Family Welfare, Social Welfare, Tribal Affairs, Women & Child Development leh Tourism Department changtu chuan khuallian niin a hmanpui. Minister hian YMA Chanmari Branch Golden Jubilee Monument a hawnna a nei nghal bawk a ni.

Golden Jubilee lawmna hun hi Pu Lalramsanga Colney, Vice President, YMA Chanmari Branch chuan a kaihruai a, khuallian Pi Lalrinpuii chuan YMA Chanmari Branch in Golden Jubilee an hmang thei chu a lawmpui a, YMA hi a intineitu hle a, kum 1980 khan kum naupang te anih laiin Lawngtlai ah YMA Treasurer a nih ve thu a sawi a ni. YMA in thil tum a neih zinga pathum pawimawh a tih hun awl hman that hi a pawimawh a, hun awl hman that na chang hre lo te hun awl hman that zirtir ang u a ti a. Zofate hmasawnna ngaihtuah hi pawimawh a tih thu sawiin zofate hmasawnna turin thil tihtur tam tak a awm a, zofaten khawvel kan denchhuah theih ve na chu tlawmngaihna hi a ni a, chubakah music thiam leh zai thiam lam ah YMA member te ngaihtuahna thar seng turin a fuih a ni. Kristian nundan tha ngaihsan hi pawimawh a ti a, Kristian nundan tha kan ngaisang tak tak em tih leh a zawm tu kan ni tak tak em tih ngaihtuah mitinte kan in ngaihtuah chian a pawimawh hle a ni a ti. Chanmari in tun hun an thleng thei hi hruaitu hmasa ten tah taka khawtlang an kaihhruaina vang a ni a ti bawk. Minister chuan Sorkar hmalakna leh hmachhawp thenkhat sawiin District Hospital te tih changtlun tum a ni a, Lunglei Civil Hospital pawh tih changtlun tura hmalak mek a nih thu a sawi, Mizoram ah Lung zaina khawl nei turin leh Kal thlak (Kidney transplant) a nih ve theihna turin chak tak a hmalak mek a nih thu a sawi bawk. Tourism Deparment ah pawh hmalak tumna sawiin Lunglei tourist Lodge chei that te, Tarmita khawtlir ah trekking point siam te, Theiriat a tawngtaina tlang hmun chei te, Tlabung Post Office leh Missionary kai tih changtlun te, Lunglei hmingput chhan chei bakah Chhimtuipui a Beino panna tur kawng tha siam a nih tur thu a sawi a ni.

Golden Jubilee lawmnaah hian YMA Chanmari Branch Secretary in report a pe a, Pu V. Rohmingthanga, President , YMA Chanmari Branch, YMA Sub-Hqrs hruaitu, Local Council aiawh ten thusawina an nei a. Golden Jubilee puala siam Souvenir 'Khawthlir' tih chu ProJ.Zorema Sr. Adviser in a tlangzarh bawk a ni. Nimin Golden jubilee lawmnaah hian Chanmari YMA hruaitu hmasa kalta te sunna hun hman a ni bawk.