Minister of State leh MFA President ni bawk Pu Lal Thanzara chuan vawiin khan Champhai Chhangphut Field-a Ri-i & Hawla Inter-Village Football Tournament khelh chu a kharna hun a hmanpui.

Minister hi Champhai DC Pu H. Lalengmawia leh officer dangte bakah Mizoram Football Association hruaituten an tawiawm a ni. Minister Pu Lal Thanzara chuan Sorkar hmalakna zarah khelmual tha leh changtlung zawk kan neih chu thalaiten tangkaipuiin, Mizoram pawnah pawh an hming an chher zel a ni, a ti a. India rama player thiam ber pawl Mizoramin kan nei chho zel a ni tiin Minister chuan sports lama tui takzet leh mi taima te tan chuan eizawnna tling a nih thu a sawi a. Sorkar pawhin a remchan dan zelin mamawhte a awm pawhin a ngaihtuahsak tur thu a tarlang a.

Minister chuam hmanni lawka Champhaia National Sub-Junior for Coca Cola Cup Qualifying Round khelh a nih vangte leh Champhai District Football Association thahnemngaihna avangin state dangten Mizoram leh Champhai pawh an hmelhriat phah thu a tarlang tel a. Final khel tur team-te chu infiamna rilru thianghlim pu a, chak zawk leh chaklo zawk nih dan thiam turin a chah a ni.

Ri-i & Hawla Inter-Village Football Tournament hi Champhai District Football Association buatsaih niin, February ni 14 atang khan khelh tan a ni a. Champhai District chhung atangin Village Council team 40 thawkchhuakin, Final-ah hian Champhai Vengthlang North VC Team-in 3-0 in Champhai Venglai VC Team an hneh a. Pakhatna hian lawmman pawisafai nuai 1 dawngin, pahnihna in sing 4 an dawng a ni.