2131/2024-2025

2024 Mimkut thla ni 19: District Health Society, Lunglei hma lakna Healthy Lunglei District Campaign hnuaiah vawiin khan Public Works Department (PWD), Lungleia thawktute tan natna inkai chhawn theih loh, Non-Communicable Disease (NCD) chungchang inzirtirna leh an hriselna dinhmun enfiahna (NCD awareness campaign & screening) buatsaih a ni.

PWD SE Conference Hall, Lungleia NCD awareness campaign & screening buatsaih hi PWD Lunglei Circle-a Sr Executive Engineer Er Vanlalmuana Fanai chuan a kaihruai a. Hun hmanpuitu Lunglei Additional Deputy Commissioner Pu James Miahlung chuan Mizoramah NCD natna chi hrang hrang - BP sang, zunthlum, cancer, adt. a hluar thu leh sawrkar hna thawk zingah NCD vanga aikal lak ngai hriat tur an tam thu sawiin, he'ng natna hian ei leh in leh nun phungah harsatna a thlen bakah inenkawl nan sum tam tak sen a ngai ṭhin a, vei lo turin nun phung uluk leh mahni inenkawl ṭhat a pawimawh a ni, a ti.

He hunah hian UPHC Hrangchalkawn-a Medical Officer Dr VL Hrechianga chuan NCD awmzia sawi fiahin, NCD natna lan chhuah dan leh natna lo awm chhan bakah, NCD natna laka inven dan tur kawng hrang hrangte a zirtir a. Zawhna leh chhanna hun hman ni bawkin, hun hman zawhah PWD-a thawktute hriselna dinhmun chu Health Department-a thawktute'n an enfiahsak nghal a ni.

Attachment

  • Loading attachment...