3719/2022-2023

Aizawl, the 1st March, 2023: Vawiin chawhma khan Hero MotoCorp chuan an CSR scheme 'Hero We Care' hnuaia Mizoram Police hnena Motorcycle/Bike 100 an pek chu hlanchhawnna hun neih a ni a, Pu Lalchamliana, Home Minister chuan khuallian niin a hman pui. He hun hi 1st MAP ground-ah hman a ni a, Mizoram Police hotute leh Hero MotoCorp hotute an tel.

Pu Lalchiamliana chuan, Heromotocorp-ten phal taka Mizoram Police te hman tur Bike 100 lai mai an pe chu a lawm thu a sawi a. Sawrkarin sum harsatna avangin thil tam tak a ti thei lo a, mi dang puihna avangtein thil tam tak a dawng thin a. DGP, Pu Devesh Chandra Srivatsva kaihhruaina hnuaia hetianga kan mamawh tak mai kan nei ta hi lawmawm ka ti a. Police hotute chungah pawh lawmthu ka sawi, a ti a. Tuna Bike 100 hi cheng nuai 79 man a ni a, hmeichhia leh naupangte an harsatnaa puihnana hman tur a ni.

Mizoram Police hi lirthei leh housing quarters lamah kan pachhe em em a, mawhphurhna ka lak tirh atangin hemi kawngah hian theih tawp kan chhuah a. Project te kan han siam a, kan beisei ang hi kan la nei thei chiah rih lo, Home Minister chuan a ti a. “Tunah hian motor 730 vel Police kan nei a, zaa 30 vel chu hman hleihtheih tawh loh a ni a. Hmun hrang hranga Police station te mamawh kan pe mai thei lo hi hrehawm ka ti a. Heng bike 100 lai hian kan chetvelnaah hian awlsamna nasa tak min thlen ka beisei”, tiin Pu Lalchamliana chuan Heromotocorp te chu Mizoram mipuite pawhin duhsak let ve turin a ngen a. Khawl thil hi duat ngai a ni a, a hmangtuten dim leh duattakin hmang se, Company te duh angin an duh ang taka hman nise, a ti bawk.

Heng bike te hi hmeichhe himna kawnga hnathawhnana hman tura tih a ni a. Hero MotoCorp hian CSR hmangin thil dang tam tak Mizoram State tan an lo ni tawh bawk a ni. Pu B  Swaminathan, Zonal Head, East Zone, Hero Motocorp leh Pu Devesh Chandra Srivastva, IPS, DGP Mizoram ten thu an sawi.Heng motorcycle 100 te hi Heromotocorp atangin Mizoram Police aiawhin Pu John Neihlaia, IPS, IGP (Hq) chuan a lo dawng a. Mizoram police unit tin hnenah an mamawh dan ang zela sem rual sa chu pek chhuah nghal a ni a. Khuallian Pu Lalchamliana chuan a pe chhuak (flag off) nghal a ni.