1611/2022-2023

Champhai, the 15th August, 2022:  India ram zalenna ni Independence Day denchhena Champhai District Football Association (CDFA) in First Division Football Tournament a buatsaih hmawrbawkna Chhangphut Field-a neih chu vawiin chawhnu dar 2 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui.

Dr. ZR Thiamsanga chuan CDFA buatsaih Independence Day Tournament final khel tur infiammite chu inelna thianghlim, rilru fim leh dik pu turin a fuih a. Covid-19 hrileng a ziaawm hnu tunhnaia football inelna huangah Champhai District-in Mizorama thiam ber leh result duhawm tak tak a nei chu lawmawm tiin, kumin chhung ngeiin Champhaiah tournament lian tham dang huaihawt thei tura ngaihtuahna sen a nih thu a sawi a. Chhun lam chauh nilo eng hnuaiah zan lam thlenga inkhelh theihna tur chhawpchhuak turin hmalak tum a nih thu a sawi bawk.

CDFA buatsaih Independence Day First Division Football Tournament Final-ah hian Vengthlang FC leh Bethel FC te an in tum a, Vengthlang FC in 2-1 in hnehna an chang a, champion lawmman trophy leh pawisafai Rs. 50,000/- an dawng a. Pahnihna Bethel FC in trophy leh pawisafai Rs. 30,000/- an dawng a ni. 

Heng bakah hian mimal leh team lawmman dangte sem chhuah a ni bawk a. Best Player atan Isak Lalrinngheta, Vengthlang FC thlan niin, Top Scorer atan goal 4 khungtu C.Lalhriatpuia, Bethel FC chu thlan a ni a. Player hmabak nei eng Most Promising Player atan Robert Thanghmingsanga, Vengthlang FC chu thlan niin, Fair Play Award chu TMFC Melbuk ten an dawng a ni.

Dr. ZR Thiamsanga hi DSYO Pu Lalnunfela Chawngthu leh Official dangten an tawiawm a ni.