Vawiin khan Chief Secretary Pu Vanhela Pachuau kaihhruaiin High Powered Committee on BRGF (Backward Region Grant Fund) chu Chief Secretary Conference Hall, New Secretariat Complex-ah an thukhawm.
Backward Region Grant Fund hi State hrang hranga District hnufualte hmasawnna tura Ministry of Panchayati Raj in sum a pek thin a ni a. Mizoramah hian Saiha leh Lawngtlai District te hmasawnna turin he Fund hi dah a ni. Meeting hmasa, April ni 26 a neih a an thurel bawhzuiin heng District pahnihte hian Panchayati Raj Ministry in kaihruaina dan a siam zul zuiin hmalak dan tur Annual Action Plan 2011-2012 an siam chu sawiho a pawmpui turin meeting-ah hian an pharh a. Panchayati Raj Ministry hian heng District pahnih te tana BRGF sum a dah hi a tipung a, Lawngtlai District tana cheng nuai 1151.00 a dah thin chu cheng nuai 1182.00 ah tipungin Saiha District tana sum dah cheng nuai 1147.00 a dah thin chu cheng nuai 1176.00 ah a tipung bawk a ni. Hei bakah hian he meeting hian Panchayati Raj Ministry in ngaihtuah tur Agenda hrang hrang a thawnte rel zui nghal a ni a. Chung zingah chuan BRGF hmanga hmasawnna hnathawh kalpui dan endiktu monitoring system siam chungchangte, District level a review committee din chungchang te, social audit chungchangte, e-Panchayat Mission Mode Project chungchang te a tel a ni.
