Dated Champhai, the 23^rd April, 2021:  Inthlan kaihhnawih inhrilhhriatna leh felfai 

taka vote thlak a nih theihna tura hmalakna, Systematic Voters’ Education & 

Electoral Participation (SVEEP) kaltlanga High School zirlaite puala District 

Election Office, Champhai District-in a buatsaih, SVEEP Quiz Competition 

2021 chu vawiin chawhnu khan I&PR Auditorium, CHANEM, Champhaiah 

zawh fel a ni. 

SVEEP Quiz Competition Final round kharna programme hi Election Officer 

Pu Lalnunfela Chawngthu chuan kaihruaiin, Quiz kaltlangin zirlai leh mipuite

 thinlungah  inthlan kaihhnawih leh thiamna dangte tuh  a nih ngei a beisei thu 

a sawi a. Quiz buatsaih kawngah fel famkim tawk lohnate awm mah se tluang 

leh hlawhtling taka zawhfel a ni thei chu lawmawm  a tih thu sawiin, a hlawhtlinna 

tura thawktu zawng zawngte, zirlai leh an mahni tawiawmtute chungah lawmhthu 

a sawi  a ni. 

He inelna huangah hian Champhai District chhunga High School 10 te an tel thei 

a, a bultanni April Ni 21, 2021 khan First round (Mizoram leh India ram election

chungchang leh Indian Polity) leh Second round (Current Affairs leh General

Knowledge) te zawh fel niin, heta point hmu sang 4 - Venglai Secondary School,

 Holy Cross High School, Bethel Mission School leh Holy Mission School-te chuan

  vawiin khan final round hmanga inelna hi an hmachhawn leh a ni.

SVEEP Quiz Competition 2021, Final round bultan hma hian car accident avanga

 nimina boral Pu TC Lalhuapzauva (54), Headmaster, Venglai Secondary School

 sunna hun hman a ni a. Hemi hnu hian Quiz Master Nl. Zosiamkimi Tlau kaihhruaiin

 Final round neih chhunzawm a ni a. Venglai Secondary School aiawha tel

 Lalhmangaihsangi leh Lalramtharzuala te chu thiam berin, Rs.10,000/- leh citation 

an dawng a. Holy Mission School aiawha tel Lallawmkimi leh Vanlalhriatrengi te 

chu pahnihna niin, Rs.7,000/- leh citation an dawng a,  pathumna dinhmun  hauhtu

 Mary Lalhmingsangi leh Lalrinngheta, Holy Cross High School aiawh zirlaite chuan 

 Rs. 5,000/- leh citation an dawng a, palina dinhmun hauhtu Bethel Mission School 

aiawha tel JH Zonuntluanga leh J. Malsawmtluanga te chuan  Rs. 3,500/-  leh

 citation  an dawng a ni.  Heng bakah hian he inelna huanga tel dang zawng zawng

 ten participation prize Rs. 2,000/- theuh an dawng bawk a ni. Lawmmante hi 

Dr.Lallawmkima DIPRO Champhai chuan a hlan a ni.