4562/2024-2025

Dated the 6th March, 2025 : Color Web Offset Press changkang tak mai vawiin khan Phunchawng hmunah hawn a ni a. Hei hian khawlchhutna lama changkanna rahbi pawimawh tak a rawn thlen dawn a ni. He hun hmannaah hian Dr.Kenneth Chawngliana, Vice Chairman, Mizoram State Planning Board chu Khuallian niin, Dr. Lalrinchhana, Principal Advisor cum Additional Secretary, Planning Department chuan inkhawm a kaihruai a.Pathian hnena inhlanna Upa Lalchungnunga'n neiin, Pu Samuel Lalmalsawma, Principal Scientific Officer, MISTIC chuan he thil pawimawh tak lo zik chhuah chhoh dan tlangpui a sawi a Mizoram Press Owners'  Association (MPOA) aiawhin Pu Lalthangvunga'n technical report a pe bawk a ni. Hetiang kawnga MPOA-in mellung pawimawh tak an siamna hian intodelhna leh, mi enge maw zatina hna an lo neih phah thei tur chu lawmawm a tih thu a sawi bawk.

Khuallian Dr. Keneth Chawngliana chuan media pawimawhna leh Media zingah Print media chu ala pawimawh ber tih a sawi a, Mizorama khawl chhutna lo awm tan chhoh dante sawiin, Mizoram State chhung ngeia hetiang khawl chhutna changkang tak neih hi a pawimawhzia a sawi a ni.Hetiang kawnga MPOA-in mellung pawimawh tak intodelhna leh mi eng emaw zatin hna an lo neih belh theih phah tur hi thil lawmawm tak zet a ni tiin a sawi.

Dr.Kenneth-a chuan, tun hma atang tawhin thil lian tham deuh chhut tur chu, a bikin sikul zirlaibu te chu, state pawn lama chhuttir a ni chawt thin thu te, hetianga pawn lama chhuttir a ni thin avang hian sawrkar-in sum tam tak a senral thin thu te a sawi a. Kum 2017 ngawt pawh khan Mizoram Board of School Education-in SCERT kal tlanga zirlai bu chhut nan Rs.7,27,15,812 lai a seng ral a ni tih sawiin hei hian state pawn lama pawisa kan luan raltir nasatzia  a lantira ni tih a sawi. Chubakah zirlaite chuan a hun taka zirlai an neih hman loh fo thute a sawi a ni. He Color offset press hian Mizoram pawn lama pawisa tam tak kan luan chhuahtir fo thinna chu kawng khatin a titlem thei dawn a, chubakah kan zirlaiten an zirlaibu a hun taka an neih hman loh fo thinna chu a sukiang thei tawh dawn a ni, a ti. Chungte ai maha pawimawh zawk chu, kan thalaiten keini pawhin kan ti thei ve a ni, tia kawng an dapna kawnga entawn tur tha tak he MPOA hmalakna hian a thlen dawn a, anmahni fuihphurna tha tak a ni dawn a ni, tiin a sawi bawk.

A thusawi khaikhawm nan Dr.Kenneth Chawngliana chuan, MPOA-in harsatna tin reng kal tlanga he Color Web Offset Press tha tak mai Mizoram chhung ngeia an han bun ta ruau mai hian Mizoram chu lehkhabu leh thildang chhutna kawnga intodelhna kawngah Mellung pawimawh tak a phun a ni, a ti a. Hemi kawnga hma latu Mizoram Press Owners' Association hruaitute leh Mizoram Science, Technology & Innovation Council (MISTIC) hruaitute hian KUT BENGA CHAWIMAWI an phu a ni, a ti bawk.