1280/2025-2026

Aizawl dated 22th July 2025: Tukin khan Education Minister Dr. Vanlalthlana, Commerce & Industries Minister Pu F. Rodingliana, leh Rural Development & Administration Minister Prof. Lalnilawma te chuan Govt. Aizawl North College leh a ṭhenawm ram leh building tlawhin a hmunah an en fiah.

Tun dinhmunah hian Govt. Aizawl North College chuan zirlai an ngah avangin an ṭhenawm hmar lama Commerce & Industries bazar hmun chu an luah ṭhen a. College hmunhma hian zirlai a dawl zawh tawh loh avangin harsatna an tawk chho mek a ni. Hemi ching fel tur hian July ni 16, 2025 khan joint meeting neih tawh a ni a. Thutlukna felfai zawk siam a nih theih nan meeting-in a lo rel tawh angin a hmun hi tlawh a ni.

Govt. Aizawl North College hmar lamah hian bazar atana hman, Commerce & Industries building awmin class lak nana hman ṭhen mek a ni a. Commerce & Industries building ram hi college atana luah a nih chuan Ramhlun North bazar hmunhma tur ruahman a ngai dawn a. Bazar building ṭhenawma sawrkar building chu MINECO-a office building sa mek, Aizawl District Local Administration Office leh office hawn thar Aizawl North Revenue Office atana luah mek a ni a. Bazaar building nen a inkarah hian MIZOFED building a tla zep a ni. Heng building chhak lam hi SCERT ram niin DIET Principal Quarters bakah staff quarters pakhat awmin, a ṭhenawm chhim lamah Public Health Engineering site office a awm a. Heng lai rama sawrkar building awmte hman dan turah hian ruahmanna kalpui dan tur ngaihtuah mek a ni a. Ram leh building hi sawrkar department hrang hrang hnuaia awm a nih avangin joint meeting hmanga hma lak zel dan tur sawi ho a ni.

Minister-te hi an department enkawl atangin official engemaw zahin an tawiawm a, chung zingah chuan Pu R. Zarzosanga, Commissioner & Secretary, Rural Development & Administration, Dr. Lalzirmawia Chhangte, Commissioner & Secretary, Commerce & Industries, Pu David Lalthantluanga, Special Secretary, School Education, Pu Chuauhnuna, Director, Rural Development & Administration, Prof. Benjamin Lalrinsanga, Joint Director, Higher & Technical Education te an tel a. Ramhlun North Local Council member-ten an ṭawiawm bawk a ni.