No.7402/2020-2021   

Vawiin chawhma khan Higher & Technical Education Minister Dr. R. Lalthangliana chuan Govt. Hnahthial College tlawhin Govt. Hnahthial College a RUSA hnuaia building sak pathum leh Hnahthial District Skill Development Programme a hawng.

Heng hawnna puala inkhawm buatsaihah khuallian Dr. R. Lalthangliana, Higher & Technical Education Minister chuan thusawiin, RUSA kaltlanga Govt. Hnahthial College in building thar tha tak tak an nei chu a lawmpui tih a sawi a, building tha neih chu thil lawmawm tak a nih rualin hlawhtlinna thlentu rahbi a nihna ang tur taka kan hman tangkai loh chuan a ho thlawn mai dawn a, Mzoram thalai lehkhathiam ram leh hnam tana chhenfakawm tak tak chherchhuahna hmanraw tangkai tak ni ngei se a duh thu leh chutiang taka a tangkaina phawk chhuak thei tura an theihna zawng zawng hmang turin Govt. Hnahthial College a zirtirtute a chah bawk a ni.

Minister chuan ziak leh chhiar thiam tamna state kan ni hi a hlut rualin hei hi kan ram hmasawnna leh hlawhtlinna tehfung, innghahna atan a hmantlak lo a ni tih kan hun tawngin a rawn hril chiang tawh a, thiamna chi hrang hrang tai darh zawnga inzirtirna kalpui a pawimawh takzet a, hemi atana pawimawh Skill Development hmanga Mizoram Youth Commission in hma an la hi a lawmawm a ni, a ti a. Lehkhathiamna mai piah bakah kan thalaite hnena thiamna bik Pathianin a dah hi haichhuak a, tihpun sak leh hlawhtlinna thlen tir tura theihtawp chhuah zel turin duhsakna a hlan bawk a ni.

Khualzahawm Dr. Vanlaltanpuia, MYC Chairman leh Higher & Technical Education Board Vice-Chairman pawhin thu sawiin tunlai khawvelah zirna kalphung pangngai (conventional education) hian hna min pe vek seng tawh lova, hna min pek theih pawh a tlem telh telh tawh avangin leh Private enterprise an len telh telh avangin Mizoram Youth Commission chuan sawrkar hna piah lamah hna chi hrang hrang thawk thei tura Mizoram thalaite chherchhuah hi a ngai pawimawh em a, thiamna bik nei (skilled labour) chi hrang hrang mamawhna a nasat zual zel dawn avangin mahni kutke a eizawng thei tura Mizoram thalaite chherchhuah hi kan tum pawimawh ber a ni, a ti a. Nimin maiah Mizoram sawrkarin Mizoram Youth Commission kaltlangin thlai lehkhathiam thlanchhuah mi 20 chu New Delhi-ah IAS Coaching kal turin a tirchhuak a, an zirna senso leh mamawh dang zawng zawng a tum sak dawn a, hetia lehkhathiam sang ho kan buaipui rual hian thalai dang, heng chanvo chang pha ve lo leh zirsang lote kan hlamchhiah thiang lova, University leh College changkang tak tak thlengoha ve lote pawh kan thlahthlam dawn lova, hemi atan hian Skill Development Programme hi na takin kan kalpui dawn a ni, a ti a. Kutthemthiamna hi eitling a ni tih he programme hmanga lan tir turin theihtawp kan chhuah dawn a ni, a ti.

RUSA Phase 2 (RUSA 2.0) hnuaia Upgradation of Existing College to Model Degree College component hnuaiah hian cheng vaibelchhe 4 hmuh niin, hemi atang hian hna pathum - Academic Building Block - B, Extension of Library Building leh Vertical and Horizontal Extension of Administrative Building thawh a ni a, Rs. 2.95 crore sen a ni a. Mizoram Technocrats Company Pvt. Ltd. in heng hna hi an thawk a ni.

Academic Building Block - B sak nan hian Rs. vaibelchhe 1.60 sen a ni a. Ground Floor hi vehicle parking area atan siam niin 37.5 m x 9.2 m (345 sq.m) a zau a ni. First Floor hi Classroom atana hman niin Classroom pathum sak niin - Classroom no.1 11m x 27.4m (301.4 sq.m) a zau, zirlai 60 thut theihna tur. Classroom no.2 5.5m x 27.4m (150.7) sq.m a zau, zirlai 30 thut theihna tur leh Classroom no.3 11m x 27.4m (301.4 sq.m) a zau, zirlai 60 thut theihna tur a ni. Mipa leh Hmeichhe inthiarna a hranga siam a ni bawk.

Second Floor hi College Hall zirlai naupang 204 leng tur atan siam a ni a, a zau zawng hi 7.6m x 27.4m (208.24 sq.m) a ni a. Mipa leh Hmeichhe inthiarna a hranga siam a ni bawk.

Extension of Library Building atan hian Rs. vaibelchhe 1 sen a ni a. Basement hi Student's Common Room atana ruahman niin 4.5m x 18.85m (84.8 sq.m) a zau niin, inthiarna room siam a ni bawk.

Ground Floor hi Library Room atana ruahman niin 4.5m x 18.85m (84.8 sq.m) a zau a ni.

First Floor ah hian Smart Class Room pahnih - zirlai 50 thut theihna tur 15m x 5.5m (82.5 sq.m) a zau leh zirlai 30 thut theihna tur 6.1m x 6.5m (39.65 sq.m) a zau a awm a. Inthiarna room siam a ni bawk.

Vertical and Horizontal Extension of Administrative Building atan hian Rs. nuaih 35 sen a ni a. Ground Floor ah hian Principal Office 4.9m x 6.4m (31.36 sq.m) a zau, intharna room telin sak a ni a. Staff Room  4.9m x 8.9m (43.61 sq.m) a zau, intharna room pahnih telin sak a ni bawk.

First Floor ah hian Classroom pahnih - zirlai 32 thut theihna tur 3.6m x 10.2m (36.72 sq.m) a zau ve ve sak niin, inthiarna room a awm bawk a ni.

Govt. Hnahthial College hi August ni 20, 1979 a din niin, tunah hian NAAC Grade C (CGPA 1.87) niin, tun dinhmunah zirtirtu (teaching faculty) 29 leh non-teaching staff 9 an awm a. Zirlai 135 awm mekin department 6 - English, Mizo, Education, Economics, Political Science leh Geography a awm a ni.

Hnahthial District Skill Development Programme Mizoram Youth Commission leh SIRD&PR, Aizawl tangkawpin an buatsaih a ni a. Core Team on Skill Development Framework, Hnahthial District-in hma an la zui ang.

Skill Development Programme bultanna atan hian Mizoram Youth Commission chuan cheng nuaih 9 a pe a, hemi hmang hian thalai 30 hnenah February ni 4 - March ni 20, 2021 chhungin Mistiri training pek an ni ang a, thalai 20 hnenah February ni 15 - March ni 1, 2021 chhungin Ar vulh training pek an ni dawn a, hemi bakah hian thiamna chi hrang hrang 13 training pek lehna tur ruahman a ni bawk a, hemi atana zawm tur inkaihhruaina "Brochure" pawh khuallian Dr. R. Lalthangliana'n a tlangzarh a ni.

Vawiin inkhawm hi Pu Biaktluanga, Commissioner & Secretary, Higher & Technical Education-in a kaihruai a, Pu Laltanpuia, ASDP-RUSA chuan technical report pe in Govt. Hnahthial College Principal Pu K. Lalsangluaia'n lawmthu sawina hun a hmang a ni.