No.3891/2021-2022

Aizawl, the 3^rd February 2022 : Vawiin khan Higher & Technical Education Minister Dr. R. Lalthangliana’n Rashtriya Uchchatar Shiksha Abhiyaan (RUSA) 2.0 hmalaknaa building sak thar pahnih a hawng a. Hengte Government T. Romana College, Republic Vengthlang tana Administrative Building cheng nuai 180 senga sak leh Institute of Advanced Studies in Education (IASE) Republic Veng atana cheng nuai 100 senga sak Educational Research & Resource Centre Building te an ni.   

Govt T Romana College Administrative Building hawnna inkhawm tawite an College Conference Hall a buatsaih ah thusawiin Minister Dr. R. Lalthangliana chuan college that dan tehfung NAAC Accreditation chungchanga a pawimawh thil hrang hrang te a sawilang a. NAAC Accreditation hnuaia B Grade a an awm mek chu duh tawk mai lovin hei aia dinhmun sang zawka inhlangkai turin zirtirtute chu kawng tin renga tan la a, inbuatsaih turin a fuih a. Hengah te hian thil thar zirlai ten an tangkaipui belh theihna tur innovation lam te chu ngaihpawimawh a tul thu a sawi. 

Zirna in changtlunna infrastructure development tel lovin zirna tha leh chhuantlak quality education neih a harsat thu sawiin Minister chuan henga te hian RUSA hnuaia College hrang hranga hmalakna tam tak a awm, thil lawmawm tak a nih rualin Ministry of HRD lamin RUSA an kalpui dan hi a muangchang a, chuvangin ka thiam loh nilovin an mahni lamah zawk thil fel lo a awm avangin kawng thenkhatah kan duh angin kan kal chak thei lo a ni, a ti. Zirna boruak academic atmosphere tha siam nan zirna in te chu zirlai ten an chenchilh theih residential ang an nih chu thil pawimawh tak nia a hriat thusawiin college in hmun hma an neih chuan hostel sak dan te hi ngaihtuah tel zel tha a tih thu a sawi bawk a, hengah hian Funding agency hrang hrangte hman tangkai thiam a tul tiin a sawi bawk a. He hunah hian Minister chuan Govt. T Romana College magazine ‘Raltiang’ tih chu a tlangzarh nghal a ni. 

Institute of Advanced Studies in Education (IASE) atana Educational Research & Resource Centre Building hawnnaah thusawiin Minister chuan IASE chu programme hrang hrang B. Ed, B.Ed(Multi Mode), M. Ed, M, Phil leh Ph. D thleng an kalpui avangin Institution pawimawh leh a bik tak an nih thu a sawi a. Extension Services hnuaia an hma lakna te chuan a huam zau thu sawiin DIET te, SCERT, MBSE, RIPANS leh Pathian thu zirna ATC leh AICS thleng te pawh an zirtir hna chuan a huam a, chuvangin IASE chu thil tam tak leh zirna hrang hrang khawmtu multi disciplinary centre a ni, a ti.

Zirtirtu te tan naupang an zirtir kawngah teaching skills ah an intuaihriam chu thil tul leh pawimawh tak a nih dante sawiin Dr. R. Lalthangliana kan zirlai naupangte hi ramchhung hmun danga zirlai dang te rualpawl pha leh chungte el pha tura kan buatsaih leh siam hi zirtirtu te chona lian tak a ni a, hei hi engtin nge zirlai naupanga kan tuh theih ang tih chu zirtirtu ten ngaihtuah ula, ka duh, a ni, a ti. He hunah hian IASE  ah “Nursery Teacher’s Training Centre” chu a hawng bawk a ni.

Heng inkhawm pahnih ( a hran ve ve a neih) te hi Pi Esther Lalruatkimi, IRS, Commissioner & Secretary, Higher & Technical Education chuan kaihruaiin Building sak chanchin Technical Report te chu Pu Laltanpuia, Additional State Project Director, RUSA hnen atangin ngaihtlak a ni a. Building hawnna ah te hian heng zirna pahnih Principal te leh zirtirtu te chu CAB tha taka zawmin an tel a ni.

Government T. Romana College, Republic Veng tana Administrative Building cheng nuai 180 senga sak hi chhawng hnih a sak niin Ground Floor ah Principal Office leh Administrative Office te dah a ni a, 1^st Floor ah Department hrang hrang Room te dah a ni a. Building hi a dung feet 61 niin a vang hi feet 31 a ni a, a satu hi Skyridge Construction & Consultancy Services, Aizawl an ni.  

Institute of Advanced Studies in Education (IASE) Republic Veng atana cheng nuai 100 senga sak Educational Research & Resource Centre Building pawh hi chawng hnih a sak niin a satu hi Skyridge Construction & Consultancy Services, Aizawl an ni a. Ground Floor chu parking atan leh machine room atana ruahman niin first floor ah hian Resource Centre leh Workshop Hall atan ruahman a ni. 

NAAC Accreditation hnuhnung berah heng zirna in pahnih te hi B Grade an hmu ve ve a ni. Govt. T Romana College hian zirlai 1320 nei mekin IASE hian zirlai 700 bawr an nei mek a ni.