1901/2025-2026

Aizawl, the 29^th August 2025 : Vawiin khan Taxation Department Auditorium ah Higher & Technical Education Department hnathawh thlirletna ‘Review Meeting’ chu a changtu Minister Dr. Vanlalthlana hova neih a ni a. Meeting ah hian Higher & Technical Department hnuaia College hrang hranga Principal leh a thawhpui te chu telin, an hnathawh pui ber – Mizorama zirna sang zawk tihchangtlun zel chungchang leh a kaihhnawih te, hemi kawnga harsatna an tawh te sutkian dan kawng te leh  hma an sawn zel theihna tur kawng hrang hrang te an sawiho a ni.

Minister Dr. Vanlalthlana chuan Department hnathawh thlirletna hun chu selna tarlan emaw a thawktute tihsual sawichhuah ngawr ngawr emaw a kawk lovin, a tum ber chu a thawktu te kalkhawmin an hnawthawh te in hriatpui tawnin, an harsatna tawh te ngaihthlaka, chungte chu engtin nge awlsam zawkin an sutkian thei ang tih ngaihtuah leh kawng dap te chu review meeting ina a tum ber a nih thu a sawi. Mizoram Sawrkar chuan college zirna leh zirna sang zawk chu a ngaihpawimawh thu sawiin tun kum 2 kalta khan central leh state sum cheng vaibelchhe 100 bawr vel chu college a zirna tihchangtlun nana hman tawh leh ruahman a ni, a ti.

Mizoram Polytechnic Lunglei chungchang sawiin Minister chuan a ram chungchanga harsatna te sukiang turin Sawrkarin in theihtawp chhuahin, hma a zel a, hma sawnna te pawh kan hmu chho mek a, changtlung taka a awm theih hma kan la zel dawn a ni, a ti. Mizoram Engineering College Pukpui chungchang pawh sawilangin Minister chuan academic session chu nakum a tan beisei a nih thu te sawiin , hemi atan hmalakna hrang hrang te chu kal chho mek a ni, a ti. State University pawh Sawrkarin a tul tul a buaipui chho mek a, tuna college hrang hranga zirna peng awmsa te bakah postgraduate subject zirna kan neih sate hmang tangkaiin Cluster Approach angin kalpui phawt tum a ni, a ti bawk.

Review Meeting hi Session chhawnghnih a hman niin Session chhawngkhatna hi Commissioner & Secretary , Higher & Technical Department Pu H. Lalengmawia’n a kaihruai a, Invitees atangin thusawi tawi ngaihtlak a nih hnuin sawihona hun hlawk tak neih a ni. Session chhawnghnihna chu Pi R. Lalmuankimi, Addl. Secretary, H &TE chuan kaihruaiin sawihona hun neih chhunzawm leh a ni.